Mari’s_მარისიაა – ასე ჰქვია ბრენდს, რომელიც ქართულ, ტრადიციულ ჩირებსა და ჩაის აერთიანებს. მარიამ თოლორაიამ ამ პროდუქტების წარმოება კოვიდპანდემიის დროს გადაწყვიტა. იდეამ გაამართლა – მის ბავშვობაში ოჯახისთვის გამორჩეული ტკბილეული ქართულ ბაზარზე მოთხოვნადი გახდა.
მარიამი “თბილისი თაიმსს” საკუთარი საქმიანობის პირველ დღეებსა და მიღწეულ წარმატებაზე უყვება.
“დედაჩემი აფხაზეთიდან გახლავთ. ხშირად მიყვებოდა, როგორ აკეთებდნენ ის და ჩემი ბებია სხვადასხვა ხილისგან ტკბილეულებს, როგორც ეს სოფლებისთვისაა დამახასიათებელი. ასევე, როგორ ინახავდნენ მათ წლიდან წლამდე. როდესაც მე და ჩემი და პატარები ვიყავით, ეს ტკბილეული ჩვენს ოჯახში ყოველთვის კეთდებოდა. რაც მთავარია, ის ყველას მოსწონდა”, – ამბობს მარიამი.
როგორც ის აღნიშნავს, მისი პროფესია სრულიად განსხვავებულია იმ საქმიანობისგან, რასაც დღესდღეობით აკეთებს.
“მე ილიას სახელმწიფო უნივერსიტეტში ვსწავლობ, სამართლის მიმართულებით. აქვე ვმუშაობდი წიგნის სახლ “ლიგამუსში”. როდესაც კოვიდპანდემია დაიწყო და ყველაფერი დაიკეტა, დავრჩი სოფელში უმუშევრად. დავიწყე ფიქრი, რა უნდა გამეკეთებინა, როდესაც ამდენი თავისუფალი დრო მქონდა. რადგან დედას გაკეთებული ჩირები ყველას მოსწონდა, მათ შორის, ძალიან ბევრი უცხოელის ყურადღებას იქცევდა, ასევე, თეორიულად ვიცოდი მისი დამზადების პროცესი, გადავწყვიტე, ამ საქმისთვის ხელი მომეკიდა. ეს ყველაფერი პატარა ბიზნესად იქცა. მთელი გაზაფხული, ზაფხული და შემოდგომა ვამზადებდი ამ ჩირებს სხვადასხვა ხილისგან. შემდეგ გადავწყვიტე – თუ ვაკეთებდი ვაშლის ჩირს, მსხლის ჩირს და აბსოლუტურად ყველა ხილს ვიყენებდი, რაც ეზოში გვქონდა, რატომ არ შემეძლო, გამეკეთებინა ხილის ჩაი. ხილის ჩაის შემადგენელი მთავარი ინგრედიენტი სწორედაც რომ გამომშრალი ჩირია. დავიწყე ხილის ჩაის დამზადება ჩემივე გაკეთებული ჩირებისგან”, – განმარტავს მარიამი.
ის ამბობს, რომ პირველი ბოქსის ვიზუალზე ძალიან ბევრი იფიქრა.
“უკვე ბოლოს, როდესაც საქმე იქამდე მივიდა, რომ უნდა დამეწყო გაყიდვები, ძალიან ბევრს ვფიქრობდი, როგორ უნდა ამეწყო პირველი ბოქსი. პირველი ნაკრები ჩემმა ბიძაშვილმა შემიკვეთა. აქედან დაიწყო ეს ყველაფერი, გავაკეთე ფეისბუქგვერდი, გადავუღე პროდუქციას ფოტოები და ამ ყველაფერს ძალიან დიდი დაინტერესება მოყვა.
უკვე მეორე წელია, რაც ამ საქმეს ვაკეთებ. ძალიან მომწონს, თან იმის გათვალისწინებით, რომ, პარალელურად, ვსწავლობ. ჩემი პროფესია კი რადიკალურად განსხვავდება. თუმცა, ვაკეთებ იმას, რაც მიყვარს და მსიამოვნებს”, – ამბობს მარიამ თოლორაია “თბილისი თაიმსთან” საუბრისას.
მასალა მოამზადა : მარიამ ტიელიძემ
