“მუზა” – რუის-ურბნისის დედათა მონასტერში დამზადებული ნატურალური პროდუქცია

ურბნისის წმ. ნეოფიტე ურბნელის სახელობის დედათა მონასტერი ძალიან ჯანსაღ და საინტერესო პროდუქციას გვთავაზობს – აქ დამზადებული, ნატურალური ხელნაკეთი ნაწარმი სასარგებლოა ჯანმრთელობისთვის. უფრო ზუსტად, დედათა მონასტერში იწარმოება 100 %-ით ნატურალური ხელნაკეთი საპნები.

ისინი ხელმისაწვდომია მთელი საქართველოსთვის. საქმიანობა, რომელსაც “მუზა” ეწოდება, უკვე მეოთხე წელს ითვლის.

დეტალებზე “თბილისი თაიმსს” დედა ნონა ესაუბრა.

“ჩვენ ვამზადებთ საპნებს მხოლოდ და მხოლოდ ბუნებრივი, მცენარეული, სამკურნალო ინგრედიენტების გამოყენებით. არ ვიყენებთ ცხოველურ ცხიმებს, პარფიუმს და სხვა სამრეწველო ქიმიკატს. საპონი არის 100 პროცენტით ნატურალური. ის ემსახურება როგორც სილამაზეს, ასევე, აქვს სამკურნალო და გამაჯანსაღებელი თვისებები.

ჩვენი პროდუქცია მთელი საქართველოსთვის არის ხელმისაწვდომი. ვაგზავნით რეგიონებშიც. უმთავრესად, მოთხოვნა თბილისიდან არის. აქ მიწოდებაში მრევლი გვეხმარება”, – ამბობს დედა ნონა და განმარტავს, რომ დედაოები უკვე სასაჩუქრე ნაკრებებსაც ამზადებენ.

“გავიდა წლები, დაგროვდა გამოცდილება და ჩვენი საქმიანობა დაიხვეწა. გვაქვს სასაჩუქრე ყუთები ჩვენი ლოგოთი. მასში შედის ჩვენი რამდენიმე ნაწარმი – ხელით მოქსოვილი, სახის ღრუბელი, ჩვენ მიერ დამზადებული სამკურნალო საცხი, ტუჩის ბალზამი – რომელიც აბსოლუტურად უსაფრთხოა, ასევე, ჩვენი ძირითადი პროდუქტი – ხელნაკეთი საპნები.

ყველა მონასტერს ოდითგანვე ჰქონდა და ახლაც აქვს ხელსაქმე. მათ შორის, ჩვენც. მაგრამ ყოველთვის მქონდა სურვილი, შემექმნა რაიმე ღირებული, რაც ადამიანის ჯანმრთელობისთვის იქნებოდა უსაფრთხო. რადგან საქართველოში არსებული პროდუქცია გაჯერებულია შხამ-ქიმიკატებით აქედან გაჩნდა სურვილი საპნის დამზადების. საპნების დამზადების საკითხი სიღრმისეულად შევისწავლეთ. ვინაიდან 4-5 წლის წინ ჩვენთან გაცილებით მწირი იყო ინფორმაცია ამ თემაზე, წიგნები ამერიკიდან გამოვაგზავნინე. შემდეგ, მოხდა ისე, რომ უკრაინაში მომიწია გამგზავრება და ამ საკითხის ირგვლივ იქაური მონასტრების გამოცდილებაც გავიგე. ნელ-ნელა ჩვენს პროდუქციას სხვადასხვა სახეობის საპონი დაემატა. დღეს უკვე 15 სახეობის საპონი გვაქვს. მადლობა ღმერთს, დავიმსახურეთ მომხმარებლის ნდობა, მოწონება და მათ მიერ წამოვიდა მოთხოვნა სხვა ნაწარმზეც. დღესდღეობით, საპნებთან ერთად გვაქვს დეოდორანტები, ტუჩის მყარი ბალზამი, სამკურნალო მალამო, სხვადასხვა საცხი. ღვთის წყალობით, ასე გავიზარდეთ და მოვედით აქამდე”, – ამბობს დედა ნონა “თბილისი თაიმსთან” საუბრისას.

მასალა მოამზადა : მარიამ ტიელიძემ