„თაფლი სახლში“ – ასე ჰქვია ბრენდს, რომელიც საქართველოს სხვადასხვა კუთხეში დამზადებულ თაფლს აერთიანებს. თუმცა, ის, თაფლის გარდა, სხვა – ჯანსაღ და სახლში მომზადებულ ნობათს გვთავაზობს.
შეიძლება ითქვას, მაღალი ხარისხის პროდუქცია კომპანიის სავიზიტო ბარათია. გარდა იმისა, რომ პროდუქტი მთელი საქართველოსთვისაა ხელმისაწვდომი, ის ქვეყნის ფარგლებსაც სცდება. დეტალებზე „თბილისი თაიმსს“ „თაფლი სახლში“-ს დამფუძნებელი, ალექსი ნასუაშვილი ესაუბრა.
რამდენი ხანია, რაც არსებობს „თაფლი სახლში“?
კომპანია დაარსდა უკვე მე 6 წელია. აქ დასაქმებულია 15-ზე მეტი თანამშრომელი, მაგრამ კომპანია, ძირითადად, ოჯახური ბიზნესია.
დეტალურად, რას და როგორ ამზადებთ?
თაფლს ვაწარმოებთ ჩვენს საკუთარ საფუტკრე მეურნეობებში, რომლებიც განლაგებულია საქართველოს სხვადასხვა კუთხეში: კახეთში, ქართლში, იმერეთსა და გურიაში, საფუტკრე მეურნეობა ითვლის 1600 ფუტკრის ოჯახზე მეტს.
ჩვენ ვაწარმოებთ მაისისა და წაბლის თაფლს, ძირითადად, დასავლეთ საქართველოში, ხოლო ცაცხვის და ალპური მინდვრის ყვავილების თაფლს ვიღებთ ქართლიდან და კახეთიდან, გუდაურში ნამთაბარები საფუტკრეებიდან.
გარდა თაფლისა, ვაწარმოებთ ჟოლოს მურაბას, კაკლის მურაბას, შინდის მურაბას, ფეიხოას კომპოტს. გვაქვს დაბრენდილი და ლამაზად შეფუთული, ცოცხლად გამომშრალი ასკილი. კახეთში გვაქვს საკუთარი ვენახები და მარანი, სადაც ვაწარმოებთ ქვევრის ღვინოებს: საფერავი, ქისი, რქაწითელი.
ასევე, ვაწარმოებთ ბადაგსა და ჩურჩხელებს.
რით განსხვავდება თქვენი პროდუქცია სხვებისგან?
ჩვენი პროდუქცია არის გათვლილი მაღალ ხარისხზე, დიდ რაოდენობის წარმოება-რეალიზაციაზე, მაგრამ – დაბალი მოგებით, რაც გვაძლევს საშუალებას, ბაზარზე ვიყოთ დომინანტი თაფლის მწარმოებელი კომპანია.
ქვეყნის ფარგლებს გარეთ თუ გაგაქვთ ის?
საზღვარგარეთ გაგვაქვს თაფლიც და ღვინოც, მაგრამ – მცირე რაოდენობით, თუმცა, კომპანია ძირითადად ქართულ ბაზარზე მუშაობს იმიტომ, რომ წლების მანძილზე ჩვენს ნატურალურ პროდუქციაზე შეჩვეული მომხმარებელი არ გვაძლევს საშუალებას, დაგვრჩეს გაუყიდავი და ჭარბი რაოდენობის, საზღვარგარეთ გასატანი თაფლი.
მასალა მოამზადა : მარიამ ტიელიძემ
