ნაკურთხი წყალს უდიდესი ძალა და მნიშვნელობა გააჩნია ქრისტიანობაში. მან განსაკუთრებული დატვირთვა მას შემდეგ მიიღო, რაც უფალი იესო ქრისტე წყალში ჩავიდა მოსანათლად. ზუსტად ამ დროს ჩაინერგა წყალში ღვთიური მადლი, სწორედ წყლით მოხდა ძველი კაცის ბუნების განახლება – პირველმქნილი ადამის ცოდვისგან გამოხსნა.
ქრისტიანობაში წყლის კურთხევის ორი ფორმა არსებობს: დიდი და მცირე. დიდი აიაზმა ეს არის 19 იანვარი, ანუ ნათლისღების დღესასწაული და მისი წინა დღე, ხოლო მცირე აიაზმა ნებისმიერ დროს, როდესაც აკურთხებენ წყალს.
ნაკურთხ წყალს აქვს ადამიანის სულიერი განწმენდის და განახლების, ცოდვების მიტევების, ბოროტთა განსხმისა და კურნების ძალა. ეს არის წყლის სულიერი თვისებები. აღსანიშნავია ისიც, რომ ნაკურთხი წყლის ფიზიკური სტრუქტურაც იცვლება, რაც არაერთხელ დაუმტკიცებია სამეცნიერო კვლევებს.
ნაკურთხი წყალი ქრისტიანული ოჯახის დაცვის განუყოფელი ნაწილია. როგორც წესი, ქრისტიანებს იგი ნათლისღების დღესასწაულიდან მოაქვთ და მთელი წელი სწორედ საჭიროებისამებრ გამოიყენებენ. მაგალითისთვის: აკურთხებენ სახლს, მანქანას და სხვადასხვა ნივთებს, იყენებენ ლოცვისას, სნეულებისას და სხვა..
ნაკურთხი წყლის გარშემო არაერთი სასწაული და კურნება არსებობს სწორედ მას შემდეგ, რაც იესო ქრისტემ მას ღვთაებრივი განსაკუთრებულობა შესძინა. ქრისტიანული უდიდესი საიდუმლო – ნათლისღება სწორედ ნაკურთხი წყლის მეშვეობით სრულდება.
საინტერესოა, საქართველოს კათალიკოს პატრიარქის, ილია მეორის სიტყვები:
“აიაზმა არის უდიდეს სასწაული ღვთისა. ნაკურთხი წყალი ყოველდღიურად უნდა მიიღოთ უზმოზე. ეცადეთ, ხშირად აკურთხოთ თქვენი საცხოვრისი, რომ მშვიდობამ და სიყვარულმა დაისადგუროს თქვენს ოჯახში!”
მასალა მოამზადა: თორნიკე ყრუაშვილმა
