„ასანა“ – ასე ჰქვია იოგას ბავშვებისთვის, რომელიც „თამაშობანას“ მორიგი პროდუქტია. სიახლე ბავშვის სხეულის, ხასიათისა და პიროვნების კულტურის ჩამოყალიბებას უწყობს ხელს. ეს ყველაფერი კი გართობით, თამაშ-თამაშით.
ჯერ საკმაოდ ცოტა დრო გავიდა მას შემდეგ, რაც აღნიშნული თამაში მომხმარებლისთვის ხელმისაწვდომი გახდა. თუმცა, მისით უკვე ბევრი დაინტერესდა.
ნაუ სონღულაშვილი „თბილისი თაიმსს“ ესაუბრა.
„იოგა ბავშვებისთვის გავაკეთეთ სალომე სარაჯიშვილთან ერთად, რომელიც არის იოგის მასტერი. ასევე, ბავშვებთან მუშაობის გამოცდილება აქვს. კოვიდპანდემიის გამო, შეიძლება ითქვას, ბავშვები ყველაზე მეტად არიან შეზღუდულები, მათ აკლიათ ფიზიკური აქტივობები, წრეებზე სიარული და ა.შ. გვინდოდა, რამე სასარგებლო ფორმა მიგვეცა აქტივობისთვის. იოგა ნერვული სისტემისთვის ძალიან სასარგებლოა და გაგვიჩნდა სურვილი, ეს საბავშვო ვერსიად გვექცია. თამაშ-თამაშში, ეს პროცესი ბავშვებისთვის ძალიან სახალისოა.
დეტალური წესებია აღნიშნული, მათ შორის, მშობლებისთვის, რაც უნდა დაიცვან – რა, როდის და რის შემდგომ უნდა გაკეთდეს. ასევე, არის ბოლო, მადლიერების ბარათი, რითაც მათ მადლიერების ქცევა უმუშევდებათ სხვადასხვა მოვლენის მიმართ. იდეაში, ეს ყველაფერი თამაშია. შესაძლებელია, მიყვეთ და ეს ყველაფერი ბოლომდე გააკეთოთ, ან შეარჩიოთ ბარათები“, – ამბობს რესპონდენტი.
როგორც ნაუ სონღულაშვილი განმარტავს, პირველი ტირაჟი სულ რაღაც ერთი თვის წინ გამოვიდა.
„პირველი, სასტარტო ტირაჟი ახალი წლის წინ გამოვუშვით. ანუ ჯერ მხოლოდ ერთი თვეა. ვფიქრობ, ძალიან კარგად იყიდება ის. სეზონი რომ გაივლის და დათბება, ჩვენ ვგეგმავთ აქტივობებს, საბავშვო ღონისძიებებს პარკებში, ღია ცის ქვეშ – სადაც ბავშვებს და მშობლებს შეეძლებათ, მოვიდნენ, ერთად ივარჯიშონ. ამით ჩვენს პროდუქტს გავააქტიურებთ. გვსურს, გავაკეთოთ ხაზი, რომელიც ბავშვებში ემოციურ მდგრადობას შეუწყობს ხელს. ამ მიმართულებით იოგა იყო პირველი, რის მოსინჯვაც ჩვენ გვინდოდა“, – ამბობს ნაუ სონღულაშვილი „თბილისი თაიმსთან“ საუბრისას.
მასალა მოამზადა : მარიამ ტიელიძემ
