ალერგოლოგ-იმუნოლოგმა ბიძინა კულუმბეგოვი ბიზნესს მოუწოდებს, “მწვანე პასპორტის” გაუქმების მიუხედავად სტუმრებს ტესტის უარყოფითი პასუხი ან/და აცრის დამადასტურებელი დოკუმენტი მოსთხოვონ.
“კერძო ბიზნესმა და არა მარტო უნდა გამოიჩინოს სამოქალაქო და სოციალური პასუხისმგებლობა და ყველა სტუმარი ობიექტზე დაუშვას ან ახალი (48 სთ) ტესტით ან ვაქცინაციის სტატუსით (ბოლო ინექციიდან 3 თვეში ბუსტერის მოთხოვნით).
ეს წესი მინიმუმ შემდეგი 1 თვე უნდა მოქმედებდეს. მე პირადად მხოლოდ ასეთ ობიექტებზე ვაპირებ სტუმრობას!”, – წერს კულუმბეგოვი Facebook-ზე.
“ომიკრონის“ გავრცელების სწრაფი ტემპისა და ვირუსის სუსტი მიმდინარეობის, ასევე მსოფლიო პრაქტიკის გათვალისწინებით, „მწვანე პასპორტის“ მოთხოვნის ვალდებულება უქმდება – აღნიშნული გადაწყვეტილება უწყებათაშორისი საკოორდინაციო საბჭოს დღევანდელ სხდომაზე მიიღეს.
შეგახსენებთ, რომ 2021 წლის პირველი დეკემბრიდან, როცა “მწვანე პასპორტის” წესი ამოქმედდა, გადაწყდა, რომ კოვიდ-გადატანილებს ეს მექანიზმი უვადოდ მიენიჭებოდათ. აღნიშნულს არც ეპიდემიოლოგები და მათ შორის არც ჯანდაცვის ყოფილი მინისტრი ეკატერინე ტიკარაძე ეთანხმებოდა. ამდენად, დიდი ალბათობით covid-გადატანილებისთვის “მწვანე” სტატუსის მინიჭების იდეა პრემიერ-მინისტრ ირაკლი ღარიბაშვილს ეკუთვნოდა.
