ადრეული ქორწინება ერთერთია იმ სოციალურ პრობლემებს შორის, რომლებიც ჩვენს ქვეყანაშია. მსგავსი ფაქტების შესახებ ჩვენ არცთუ ისე იშვიათად გვესმის. რამდენად საგანგაშოა შესაბამისი მოცემულობა საქართველოში და რა არის საჭირო იმისთვის, რომ ეს პრობლემა აღმოიფხვრას – “თბილისი თაიმსს” გენდერისტი, მარი მესხი ესაუბრა.
“ჩვენ საქართველოში გვაქვს რეგიონები, სადაც ადრეული ქორწინება არის ტრადიციის ნაწილი. არ ვიცი, რამდენად მზარდია ეს ტენდენცია. მე ვფიქრობ, რომ გაიზარდა ფაქტების გამოვლინების მაჩვენებელი და ამის ფონზე შეიძლება, რიცხვები იყოს მაღალი. არ მგონია, რომ ეს ტენდენცია მზარდია. ჩვენ მოვახდინეთ არასრულწლოვანთან სქესობრივი კავშირის კრიმინალიზაცია. თავისთავად, ეს არის პრევენციული მნიშვნელობის, რომ ხელი შეუშალოს ადრეულ ქორწინებებს.
როგორც უკვე ვთქვი, ეს არის ტრადიციის ნაწილი და არის სამუშაო, რომ იმ რეგიონებში, სადაც ადრეული ქორწინება მიღებულია, ეს დამოკიდებულება შეიცვალოს. განსაკუთრებით, ეს მდედრობითი სქესის წარმომადგენლებზე აისახება. მათ უნდა მიეცეთ საშუალება, მიიღონ განათლება და არ წაერთვათ ბავშვობა. მარტო საკანონმდებლო ცვლილებები საკმარისი არ არის. ის არ არის ეფექტური, პროდუქტიული. საჭიროა აქტივობები.
მე იმედს ვიტოვებ, რომ ეს პრობლემა დაძლევადია. თუმცა, არ მგონია, რომ ეს საკითხი ძალიან გავრცელებული და კატასტროფულია”, – ამბობს მარი მესხი “თბილისი თაიმსთან” საუბრისას.
მასალა მოამზადა : მარიამ ტიელიძემ
