დღეს სხვადასხვა ბიზნესის წამოწყების იდეა ადამიანთა დიდ ნაწილს აქვს. ისინი ფიქრობენ, რის გაკეთება არის შესაძლებელი, რაც მათთვის სასიამოვნო პროცესიც იქნება და, ამასთანავე, შემოსავლის წყარო. რა უნდა ვიცოდეთ, თუ საკუთარი საქმიანობის წამოწყებას გადავწყვეტთ და როგორ გადავლახოთ სირთულეები – ამის შესახებ „თბილისი თაიმსს“ გაყიდვების სპეციალისტი, სოფო გოლეთიანი ესაუბრა.
„პირველ ყოვლისა, ძალიან მნიშვნელოვანია ბაზრის კვლევა. ამით დამწყები ბიზნესმენები იგებენ, არსებობენ თუ არა კომპანიები, რომლებიც მსგავსი საქმიანობით არიან დაკავებულები, რამდენი ხანია – ისინი არსებობენ, რა არის მათი ძლიერი და სუსტი მხარეები. ეს იმისთვის არის საჭირო, რომ დამწყებმა ბისნესმენმა იპოვოს ის ნიშა, რომელსაც დაიკავებს ბაზარზე. წინააღმდეგ შემთხვევაში, თუ შენ გაჯერებულ ბაზარზე არ შემოდიხარ განსხვავებული ნიშით, ყველაფერი რთულდება. ჩვენ ვიცით ძალიან ბევრი სტარტაპი, რომელიც დაწყებულა და გამქრალა, რადგან პოციზიები ვერ გაიმაგრა.
ბაზრის კვლევის შემდგომ, საჭიროა, ვიცოდეთ, რა მესიჯს ვგზავნით მომხმარებელთან. მაგალითად, მნიშვნელოვანია სლოგანის შერჩევა. ეს არის იმის სიგნალი მომხმარებლისთვის, თუ როგორ იწყებს პოზიციონირებას. ასევე, გასათვალისწინებელია ფერები – რამდენად იწვევს ის კეთილგანწყობას საზოგადოებაში“, – ამბობს სოფო და ხაზს უსვამს, რომ ამ ყველაფრის შემდგომ საჭიროა, შეფასდეს პროდუქტი, რომელიც მწარმოებელს ბაზარზე გააქვს.
“ამის შემდგომ, იწყება იმაზე ფიქრი, თუ როგორია ჩემი პროდუქტი – რა არის მისი ძლიერი და სუსტი მხარეები, რით უნდა დავაინტერესო მომხმარებელი. როცა კომპანია ახალია, მან მომხმარებელს უნდა “გადაუგდოს ანკესი”. ამისთვის მიმართავენ სხვადასხვა ხერხს. ამიტომაც არის, რომ ბევრი კომპანია დაბალი ფასებით შემოდის, თუკი მას არ აქვს იმდენი თანხა, რომ მარკეტინგული კამპანია აწარმოოს. დაბალი ფასებით ისინი “აიძულებენ” ადამიანებს, რომ ეს ახალი პროდუქტი მოსინჯონ.
მნიშვნელოვანია გუნდი – ხშირად არის, რომ სტარტაპერებს არ ჰყავთ გუნდი. ამ დროს ძალიან მნიშვნელოვანია თვითონ დამფუძნებლების აქტიურობა. მე მათ ხშირად ვურჩევ, თვითონ ესაუბრონ მომხმარებლებს და გააკეთონ აქციები. ბოლო დროს იყენებენ ინფლუენსერებს“, – განმარტავს სოფო გოლეთიანი.
როგორც გაყიდვების სპეციალისტი ამბობს, დამწყები ბიზნესმენებისთვის ბოლოდროინდელ გამოწვევას მარკეტინგული კამპანიის საწარმოებლად თანხების არქონა წარმოადგენს.
„სტარტაპერებს ბოლო პერიოდში ყველაზე დიდი გამოწვევა აქვთ ის, რომ მათ არ აქვთ თანხა მარკეტინგული კამპანიის საწარმოებლად. თუ პროდუქტი მართლა არ არის ძალიან განსხვავებული, ბევრი სტარტაპი იძირება სწორედ უსახსრობის გამო, თუ ბიზნესი კარგია, მათ უჩნდებათ ხოლმე ინვესტორები. ათი ბიზნესიდან 2-3 გადის სასიცოცხლო ციკლს – პირველი 2-3 წელი ბიზნესი არის სტარტაპი. ძალიან ბევრი ექსპერიმენტის ჩატარება უწევთ მათ.
თუ ფიქრობთ, რომ თქვენი იდეა კარგია და გჯერათ მისი, მაშინ არცერთ ეტაპზე არ უნდა დანებდეთ“, – ამბობს სოფო გოლეთიანი „თბილისი თაიმსთან“ საუბრისას.
მასალა მოამზადა : მარიამ ტიელიძემ
