ხელოვნებას, შემოქმედებას არაერთი საინტერესო, ხშირად საუცხოო მიმართულება აქვს. ჩვენ ხშირად გვიკვირს, რამდენად უსაზღვროა იმ ადამიანების ფანტაზია, რომლებიც ხელოვნების ნიმუშებს ქმნიან.
ნათია ეფრემიძე, სხვა მიმართულებებთან ერთად, ალმასებით ნამუშევრების შექმნით არის დაინტერესებული. აშკარაა, რომ ეს საკმაოდ საინტერესო იდეაა. სწორედ ამ იდეის შესახებ, “თბილისი თაიმსს” ნათია თავად ესაუბრა.
რის გამო გაგიჩნდათ სურვილი, ალმასებისგან ნამუშევრები შეგექმნათ?
ძალიან მიყვარს ხელოვნება და ხელოვანი ადამიანები. ალმასებით ნამუშევრის შექმნას რაც შეეხება – დაახლოებით, ორი წლის წინ დავიწყე. უბრალოდ, ტრაფარეტებს ვაკეთებდი ალმასებისგან. რამდენიმე თვეა, იდეა მომივიდა, რომ ჩემი ფანტაზიით შემექმნა სხვადასხვა ნამუშევარი. ვცადე და გამომივიდა. ამ ეტაპზე, ძალიან ბევრი ნამუშევარი მაქვს. ესენია ბროშები, საყურეები, გულსაკიდები, ბრელოკები, ჭიქის სადგამები და ასე შემდეგ.
პროცესს როგორ შეაფასებთ – ბევრ სირთულეს უკავშირდება ის?
პროცესი ძალიან მსიამოვნებს და, რა თქმა უნდა, ის დროსა და ძალისხმევას მოითხოვს.
გარდა ამისა, ხელოვნების სხვა მიმართულებებით თუ ხართ დაინტერესებული?
ადრე ქვებზეც ვხატავდი, ერთგვარი გატაცება იყო ჩემი. ქსოვაც მეხერხება და არაერთი რამ მაქვს შექმნილი. ჩანთების ქსოვაც მოვსინჯე ადრე. ამ ეტაპზე, ალმასებით ვარ გატაცებული და მომწონს, რასაც ვქმნი ჩემი ფანტაზიით.
ეს ყველაფერი თქვენთვის შემოსავლის წყარო თუ არის?
ჯერჯერობით, რეალიზება არ მომიხდენია. უბრალოდ, ვდებ ჯგუფებში, რომ გაეცნოს ხალხი ჩემს ნამუშევრებს. ბევრი ახლობელი გავახარე ჩემ მიერ შექმნილი სიფერადეებით.
იმედია, მოთხოვნადი გახდება ის ნივთები, რომლებსაც ვამზადებ და რეალიზებასაც მოვახდენ მომავალში.
მასალა მოამზადა : მარიამ ტიელიძემ
