ე.წ. ციხის ბუნტის საქმეზე ბაჩო ახალაიას გამამართლებელი განაჩენი გასაჩივრდება. პროკურატურამ სააპელაციო სასამართლოში სარჩელის შეტანის გადაწყვეტილება მიიღო.
საუბარია იმ ეპიზოდზე, რომელიც ერთ-ერთი მსჯავრდებულის უკანონოდ გაყვანას ეხებოდა და სამსახურებრივი უფლებამოსილების გადამეტებით კვალიფიცირდებოდა.
ბრალდების მხარის მტკიცებით, ამ ეპიზოდში ახალაიასა და მასთან ერთად ბრალდებულ მეგის ქარდავას გამართლება უკანონოა და საქმეზე შეკრებილ მტკიცებულებებს ეწინააღმდეგება.
შეგახსენებთ, რომ 28 ოქტომბერს მიღებული გადაწყვეტილებით, მოსამართლემ სასჯელაღსრულების დეპარტამენტის ყოფილი ხელმძღვანელი ახალაია, ასევე მეგის ქარდავა, რევაზ ჭარბაძე და დავით ჭაკუა დამამცირებელი და არაადამიანური მოპყრობის ჩადენაში დამნაშავეებად ცნო, თუმცა ამავე ეპიზოდში დანაშაულთა ერთობლიობით წარდგენილი ბრალდება, რომელიც სამსახურებრივი უფლებამოსილების დამამძიმებელ გარემოებებში გადამეტებას გულისხმობდა, ოთხივე მათგანს მოუხსნა.
პროკურატურის გადაწყვეტილებას ცოტა ხნის წინ ახალაიას ადვოკატი გოგა ონიანი გამოეხმაურა.
13.11.13
