თბილისის მერი კახა კალაძე უკრაინელ ხალხს სოლიდარობას უცხადებს. როგორც მან დედაქალაქის მთავრობის სხდომის დაწყებისას განაცხადა, პირადად ის მზად არის, მიიღოს უკრაინელი ოჯახები და საკუთარი სახსრებით უზრუნველყოს მათი ცხოვრების ხარჯები იქამდე, ვიდრე უკრაინაში მშვიდობა არ დაისადგურებს.
„შემაშფოთებელია უკრაინაში მიმდინარე ომი. უკრაინაში შეჭრა და სამხედრო მოქმედებების წარმოება არის მიუღებელი და ეწინააღმდეგება საერთო სამართლის წესებს და პრინციპებს. რთულია ემოციების გარეშე უყურო ამ ყველაფერს. ჩვენ ყველას გვტკივა თითოეული დაკარგული სიცოცხლე, ცრემლი და ჭრილობა. უკრაინასთან მე განსაკუთრებული სიყვარული მაკავშირებს, გარკვეული წლები ვცხოვრობდი კიევში და ბევრი დასამახსოვერებელი წუთი მახსოვს, ბევრი წარმატება, ბევრი გამარჯვება და დიდი სიყვარული მაკავშირებს უკრაინელ ხალხთან. მინდა, სოლიდარობა გამოვუცხადო მათ.
ჩვენ აუცილებლად ჩავერთვებით იმ ჰუმანიტარულ დახმარებაში, რომელსაც ცენტრალური ხელისუფლება ახორციელებს. ბევრი ადამიანის ზარი შემოდის, ჩვენი მეგობრების, აქტიურობენ ბიზნეს-სექტორის წარმომადგენლები, ყველა გამოხატავს მზადყოფნას, ჩაერთოს მხარდამჭერ აქციაში“, – განაცხადა კახა კალაძემ.
მან თავის მოადგილე ილია ელოშვილს დაავალა, ორგანიზება გაუკეთოს, რომ გამოიყოს კონკრეტული ადგილი, სადაც ყველა ადამიანს, ბიზნესმენებს შესაძლებლობა მიეცემათ ჰუმანიტარული დახმარების შეგროვებაში მიიღონ მონაწილეობა.
„ამასთან, ვიცით, რომ უკრაინიდან ადამიანებს გაჰყავთ ოჯახები, საქართველო მზად არის ეს ოჯახები მიიღოს. პირადად მე, ჩემი მეგობრებით მზად ვარ მივიღო ეს ოჯახები, პირადად მეც ჩავერთო ჩემი სახსრებით და უზრუნველვყო ამ ადამიანების განთავსება იქამდე, ვიდრე მშვიდობა არ დაისადგურებს უკრაინაში“, – განაცხადა კალაძემ.
ასევე, საჭიროების შემთხვევაში, უკრაინის მოქალაქეებისთვის საზოგადოებრივი ტრანსპორტით გადაადგილება იქნება უფასო.
გარდა ამისა, თბილისის მერმა, ქართველ დიპლომატებს უკრაინაში დარჩენისთვის მადლობა გადაუხადა. აქვე კახა კალაძემ განაცხადა, რომ საქართველოყველა საერთაშორისო პლატფორმაზე უკრაინის მხარდაჭერას აფიქსირებს.