ძალიან ბევრს ახსოვს იმ ნუგის გემო, რომელიც ბავშვობასთან ასოცირდება. მეტიც, ბევრი ჩვენგანი მუდმივად ამ არომატს ეძებს და არცთუ ისე ხშირად პოულობს მიახლოებულსაც კი.
სწორედ “შოკოჰოლიკი” სთავაზობს ადამიანებს გემოს, რომელიც განსაკუთრებულ ემოციებთან არის დაკავშირებული.
თეა სამადაშვილი-ედიშერაშვილი მიკრო მეწარმეა. პარალელურად, კი ჟურნალი “გემრიელია“-ს პასუხისმგებელი რედაქტორი. კულინარია , კერძოდ კი კონდიტერია, მისთვის საყვარელი საქმიანობაცაა და შემოსავლის წყაროც. ის “თბილისი თაიმსს” ესაუბრა.
“ვაწარმოებთ არტიზანულ შოკოლადებს, ტრიუფელებს, ბონბონებს და რამდენიმე სახეობის ნუგას. ჩვენი ერთგული მომხმარებლების დამოკიდებულება, შეფასება და გაყიდვების რაოდენობა მეტყველებს იმაზე, რომ ჩვენი პროდუქცია აბსოლუტურად განსხვავდება საქართველოს ბაზარზე არსებული ხელნაკეთი ტკბილეულისგან. თამამად ვიტყვი, რომ მსგავსი ნუგა, რომელსაც შოკოჰოლიკი აწარმოებს, საქართველოში არაა და არამარტო საქართველოში ☺
რესპონდენტი ხაზს უსვამს, რომ ნუგის წარმოებისას მაქსიმალურად ცდილობს, ქართული პროდუქცია გამოიყენოს.
“მაქსიმალურად ვცდილობ, რომ ქართული პროდუქცია გამოვიყენო. ჩემი მიზანია ხელი შევუწყო ქართულ ბიზნესს, განსაკუთრებით კი ჩემნაირ სტარტაპერებს. ასე ვყიდულობ ვარდის ფურცლებს, ჟოლოს ჩიფსები, ჩირებს და აშ. თუმცა არის ისეთი ინგრედიენტები, რომლებიც ქართულ ბაზარზე იმპორტირებულია. მაგალითად ბელგიური შავი შოკოლადი, რომელიც გამოიყენება ჩვენს არაჩვეულებრივ ტრიუფელებში და ბონბონებში. ვცდილობ მუდმივი სიახლე შევთავაზო ჩვენს მომხმარებლებს. ბოლო სიახლეა ვარდის ნუგა სუბლიმირებული ჟოლოთი, ფისტით და ნუშით.
ამ ეტაპზე გვქავს ონლაინ მაღაზია და საკურიერო მომსახურება თბილისის მასშტაბით. ძალიან ამაყი ვარ, რომ შოკოჰოლიკის პროდუქციის 50% საზღვარგარეთ მიაქვთ საჩუქრების სახით _ ამბობს თეა სამადაშვილი-ედიშერაშვილი.
მასალა მოამზადა : მარიამ ტიელიძემ