რუსეთ-უკრაინას შორის მიმდინარე ომს რუსეთის წინააღმდეგ უკვე არაერთი სანქციის ამოქმედება მოჰყვა. როგორ აისახება ეს ყველაფერი ხორბლის ბაზარზე, რომლის 20%-ს რუსეთი, ხოლო 10%-ს უკრაინა წარმოადგენს და აქვს თუ არა საქართველოს ალტერნატივა, სხვა გზებით მიიღოს ხორბალი და ფქვილი
“თბილისი თაიმსს” ხორბლისა და ფქვილის მწარმოებელთა ასოციაციის აღმასრულებელი დირექტორი, ლევან სილაგავა ესაუბრა.
“ორი კვირაა, რაც ზღვა დაკეტილია – ჯერ კიდევ არ იყო დაწყებული ომი უკრაინასა და რუსეთს შორის. შესაბამისად, არა მხოლოდ ჩვენ, არამედ მსოფლიოს ძალიან დიდი ნაწილისთვის, ვისაც ხორბალი რუსული და უკრაინული პორტებიდან გაჰქონდა – აკვატორია დაკეტილია, ფასი მომატებულია. უკრაინა და რუსეთი მთლიანი ბაზრის, დაახლოებით, 30 პროცენტს წარმოადგენენ, რუსეთი – 20 %, უკრაინა – 10 %. შესაბამისად, ამან იმოქმედა ხორბლის ფასებზე. რუსეთიდან ალტერნატიული გზები, პრინციში, გვაქვს. ეს არის ლარსის საბაჟო. არის ასევე რკინიგზა რუსეთიდან აზერბაიჯანის გავლით. გარდაბნის რკინიგზის სადგური. ამ ორი მიმართულებით მოდის რუსეთიდან ხორბალი და ფქვილი.
ცხადია, რუსეთს საკუთარი პროდუქტის გაყიდვა უნდა. ეს მისთვის ძალიან დიდი სავალუტო შემოსავალია. თუ, პოლიტიკური ვითარების ფონზე, შეწყდა ხორბლის შემოტანა, გვაქვს ყაზახეთის მიმართულება და თურქეთის ორი მიმართულება. გარდა ამისა, ზღვით არის ერთი მიმართულება, რომელიც გახლავთ რუმინეთის პორტი – კონსტანცა. ის შავი ზღვის პორტია, თუმცა, საკმაოდ არის დაშორებული, გეოგრაფიული თვალსაზრისით, იმ არეალსა და აკვატორიას, სადაც არის დაირისპირებსა უკრაინასა და რუსეთს შორის. ჩაკეტილია აზოვის ზღვა და შავი ზღვის აკვატორია”, – აღნიშნავს სილაგავა და ხაზს უსვამს, რომ 130 ქვეყანას ხორბალი რუსეთიდან ზღვით გაჰქონდა, ამ ეტაპზე კი, ისინი რუმინეთისაკენ არიან მიმართულნი.
ხორბლისა და ფქვილის მწარმოებელთა ასოციაციის აღმასრულებელი დირექტორის თქმით, იყო რამდენიმე შემთხვევა, როდესაც თანხები რუბლში გადაირიცხა.
“გადარიცხვებს რაც შეეხება – ვიცით, რომ ის არ ხორციელდება დოლარსა და ევროში. თუმცა, რუბლით გადაირიცხა, რამდენიმე შემთხვევაში. ჩვენი რამდენიმე დატვირთული გემი ვერ გამოვიდა და ჩარჩენილია რუსეთში. სხვა ქვეყნების სულ 153 გემია ჩარჩენილი”, – განაცხადა ლევან სილაგავამ.
მასალა მოამზადა : მარიამ ტიელიძემ
