პანკისელი კერამიკოსები – სწორედ ასე შეგიძლიათ, მოიძიოთ „ფეისბუქ“ გვერდი და ნახოთ, რას გვთავაზობს პანკისელი კერამიკოსი ქალების სახელოსნო. ის დუისში, გერმანიის საერთაშორისო თანამშრომლობის საზოგადოების (GIZ), ჰანოვერის ქართული სათვისტომოს და კახეთის რეგიონული განვითარების ფონდი KRDF-ის მხარდაჭერით შეიქმნა.
რას საქმიანობენ სახელოსნოში ქალბატონები და რა წარმოადგენს მიზანს, რის გამოც ის დაარსდა – „თბილისი თაიმსს“ პროექტის ავტორი, თორნიკე მურცხვალაძეს ესაუბრა . თორნიკე ჰანოვერის ქართული სათვისტომოს სახელით, საქართველოში ჰუმანიტარულ და განვითარების პროექტებს ახორციელებს და ჰანოვერის ქართული სათვისტომოს თანადამფუძნებელი და თავმჯდომარეა. მისი და კახეთის რეგიონული განვითარების ფონდის KRDF აღმასრულებელი დირექტორის ქალბატონი თამარ (იზა) ბექაურის მხარდაჭერით მოხდა პანკისელი ქალების კერამიკის ხელსაქმით დაინტერესება და არსებული სახელოსნოს გაფართოება და აღჭურვა.
რამდენი ხანია, პანკისელი კერამიკოსი ქალების სახელოსნო არსებობს?
პანკისის ხეობაში არსებობს კახეთის რეგიონალური განვითარების ფონდის მიერ დაფუძნებული სათემო ცენტრი და სახელოსნო, სადაც 2017 წლიდან ადგილობრივ ქალებსა და ახალგაზრდებს ასწავლიან კერამიკული ჭურჭლის წარმოებას. თუმცა ჩვენს პროექტამდე კერამიკის სწავლებას ძალზე პრიმიტიულ ხასიათი ჰქონდა და უფრო მეტად არტ-თერაპიას ემსახურებოდა. ჩვენი პროექტის ფარგლებში, სახელოსნო აღვჭურვეთ თანამედროვე დანადგარებით და ხელსაწყოებით, რაც მთავარია, ადგილობრივ ქალებს მივეცით კერამიაზე მუშაობისა და გაყიდვადი პროდუქტის შექმნის ცოდნა.
რა არის ის ძირითადი მიზანი, რაც პროექტს უდევს საფუძვლად?
ჩვენი პროექტით გვინდა, რომ პანკისი თემში მცხოვრებ ქალებს და ახალგაზრდა გოგონებს მივცეთ ცოდნა და შესაძლებლობა გაძლიერების, ეკონომიკური დამოუკიდებლობის მოპოვებისა და საზოგადოებაში თავიანთი როლის გაზრდის. პროექტის ფარგლებში, პანკისელმა ქალებმა შეისწავლეს კერამიკაზე მუშაობა და გაიარეს მეწარმეობის კურსი. კერამიკაზე მუშაობა პანკისელ ქალებს გერმანიაში მოღვაწე ქართველმა კერამიკოსმა ნონა ოთარაშვილმა შეასწავლა; ნონა 2001 წლიდან ქალაქ ფრაიბურგში კერამიკის სასწავლო ცენტრს ხელმძღვანელობს. ანტრეპრენერული შესაძლებლობების განვითარებაზე კი პანკისელ ქალებთან ნინო ანდრიაძემ იმუშავა. ნინო თხილეულის პასტების მწარმოებელი კომპანის „ჭკვიანი თხილი“ და საკონსულტაციო კომპანია Mindworks-ის დამფუძნებელია.
გაამართლა თუ არა მან და სასურველი შედეგი თუ მიიღეთ?
პანდემიის მიუხედავად, შევძელით, ადგილზე ჩაგვეტარებინა კერამიკის და მეწარმეობის ტრენინგები. ჩვენ ძალიან კმაყოფილები ვართ პანკისელი ქალების მონდომებითა და სიყოჩაღით.
ნამუშევრების მიმართ როგორია საზოგადოების ინტერესი?
ჯერჯერობით, მხოლოდ ერთხელ გვქონდა პანკისელი ქალების მიერ შექმნილი კერამიკა თბილისში, ორბელიანების ბაზარზე გატანილი. ნამუშევრებმა დიდი მოწონება დაიმსახურა.
„ფეისბუქ“-ზე საკმაოდ პოპულარულია პანკისელი ქალების კერამიკა.
მასალა მოამზადა : მარიამ ტიელიძემ
