“მელომე” – ხისგან დამზადებული პერსონაჟები და ზღაპრები ორ ენაზე

მშობლები მუდამ ძიებაში არიან, შესთავაზონ საკუთარ შვილებს რაიმე ახალი, გამორჩეული, საინტერესო… იდეაც არაერთია, რომელიც სწორედ ამ მახასიათებლებს მოიცავს. “მელომე” სწორედაც რომ განსხვავებულს გვთავაზობს.

კომპანიის ისტორია არცთუ ისე დიდი ხნის წინ დაიწყო – თუმცა, დასახულმა მიზანმა  გაამართლა. ეს იმიტომ, რომ მათ მიზნად, კოვიდპანდემიიდან გამომდინარე, ბავშვებში სტრესის შემცირება და მშობლებსა და მათ შვილებს შორის კომუნიკაციის გაჯანსაღება დაისახეს. კომპანიის დამფუძნებლები თეონა თხელიძე და ნინო ხარგელია არიან. “თბილისი თაიმსს” სწორედ ისინი ესაუბრნენ.

თავდაპირველად, იდეის შესახებ რომ გვიამბოთ.
იდეა, შექმნილიყო ახალი, ქართული და საინტერესო, გაჩნდა კოვიდ პანდემიის პერიოდში, როცა ყველა მშობელს და ბავშვს შეეხო გარე სამყაროსთან იზოლაცია. ამან განაპირობა სწორედ იდეის განხორციელება შეგვეთავაზებინა ბავშვებისათვის  ახალი, საინტერესო, შემოქმედებითი და სათავგადასავლო აქტივობა, რომელშიც ბავშვებთან ერთად ჩართულნი იქნებოდნენ მშობლები, რაც თავისთავად აძლიერებს  მშობელსა და ბავშვს შორის ემოციურ კავშირს, რასაც დიდი მნიშვნელობა აქვს.
ჩვენი მიზანი იყო კორონავირუსის პანდემიასთან დაკავშირებული იზოლაციით გამოწველი ფსიქო-ემოციური ზიანის შემცირება და მშობლებსა და ბავშებს შორის კომუნიკაციის გაუმჯობესება.  ამიტომ, ბევრი ფიქრისა და შრომის შედეგად, დიდი  სიყვარულით შეიქმნა საინტერესო და საყვარელი ზღაპრის გმირები, რომლებმაც დიდი მოწონება გამოიწვია ჩვენს პატარა მეგობრებში.

საინტერესოა კომპანიის სახელწოდება – რატომ “მელომე”?
“მელომე” დაკავშირებულია თავისთავად თამაშთან, რომელიც საინტერესო ისტორიას მოგვითხრობს და  ჩვენზე ძალიან დიდი შთაბეჭდილება მოახდინა.
თავისუფალი სვანეთის დროშა – ლემი (ლომი), რომელიც, გადმოცემით, წინ უძღოდა სვანეთის ლაშქარს ბრძოლის დროს. მისი მფლობელი იყო ხევის უფროსი, რომელსაც მელომე ეწოდებოდა. ლემი გამოჰქონდათ “ჰულიშობის” დღესასწაულზე, ჰულიშობა არის საზაფხულო დღესასწაული, რომელიც ბეჩოში ყოველ წელს ტარდება 30 ივნისს. მასში გაერთიანებულია სხვადასხვა ღონისძიებები: ცხენების დოღი, სპორტული და საბრძოლო ხელოვნებებში შეჯიბრი, რომელიც სამ დღეს გრძელდებოდა. თუ დოღში მელომე გაიმარჯვებდა, ეს ხევისთვის სასიკეთოდ მიაჩნდათ. ლემი არის ყვითელი აბრეშუმისგან შეკერილი ცხოველის ფორმა, რომელიც მოძრაობისას ჰაერით ივსება და ლომის სახეს იღებს. ლემი შეკერილი იყო ყვითელი აბრეშუმისგან, თუმცა უფრო ახლო წარსულში ბამბის ქსოვილისგან შეკერილ დროშასაც  იყენებდნენ. ძველი აბრეშუმის დროშა მოიძია ექვთიმე თაყაიშვილმა, თბილისში ჩამოიტანა და მუზეუმს გადასცა.

დეტალურად, რას ამზადებთ?
კომპანია „მელომე“  ქმნის მაღალი ხარისხის ხის სათამაშოებს და  მიზნად ისახავს  ბავშვების სოციალურ-ემოციურ განვითარებას. კომპანია „მელომე“  წარმოებაში  იყენებს  ნატურალურ   ხის  მასალა- წიფელს და ეკოლოგიურად  სუფთა წარმოების საღებავს, რომელიც არ შეიცავს მძიმე მეტალს და შეესაბამება სათამაშოების უსაფრთხოების ევროპულ სტანდარტებს. თითოეული ხის სათამაშო მუშავდება ცვილნარევი ზეთით.
 
რით არის თქვენი სათამაშოები გამორჩეული?
აღსანიშნავი და გამორჩეულია “მელომეს” პროდუქტი იმით, რომ ჩვენ გავაცოცხლეთ  ზღაპრის გმირები – კომბლე და სამ გოჭი, რომლებიც თავიანთი თავგადასავლებით ქმნიან  შემეცნებითი პროცესის ჯადოსნურ სამყაროს. სათამაშოებთან ერთად, წარმოდგენილია ზღაპარი ქართულ და ინგლისურ ენაზე.
გარდა ამისა, პატარებს შეუძლიათ,  ითამაშონ, ხელახლა გამოიგონონ ისტორია, მოაწყონ თამაშების სხვადასხვა თავგადასავალი, გამოუგონონ მათ ახალი სახელები, ითამაშონ სხვადასხვა ან ცნობილი ისტორია. ეს ყველაფერი შექმნილია ბავშვის ფანტაზიის გასაღვივებლად.
 
როგორ შეაფასებთ, რამდენად წარმატებული აღმოჩნდა თქვენი იდეა?
წარმატებულია იმით, რომ უკვე რამდენიმე ადამიანია ჩართული და დასაქმებული ამ პროდუქტის შექმნაში, პროდუქტი დამზადებულია საქართველოში, ამავდროულად, ხდება ქართული ხალხური ზღაპრის – კომბლეს პოპულარიზაცია, რაც ბაზარზე გავედით, მალევე ვიგრძენით დიდი ინტერესი, საკმაოდ დიდი მოწონება დაიმსახურა იდეამ და შექმნილმა ნამუშევრებმა.
ბევრი ახალი, საინტერესო იდეის განხორციელებას ვაპირებთ, დიდი იმედით – მშვიდობა იქნება სამყაროში.

მასალა მოამზადა : მარიამ ტიელიძემ