ფუტკრის პროდუქტები – სწორედ ამ მიმართულების გახლავთ წარმოება, რომელსაც ბრენდი – „გოლეულა“ აერთიანებს. მრავალფეროვანი, სასარგებლო, საუცხოო შემოთავაზებით, ის ბევრისთვის გახდა საინტერესო და მომხმარებელთა რიცხვი სულ უფრო და უფრო იზრდება. წარმატება, უმთავრესად, საქმის სიყვარულმა განაპირობა. დეტალურად, „თბილისი თაიმსს“ სოფო ტაბატაძე უყვება.
რას აწარმოებს ბრენდი „გოლეულა”?
„გოლეულა”-ს ბრენდი, დაახლოებით, სამი-ოთხი წელია, არსებობს და მისი სახელით იწარმოება ფუტკრის პროდუქტები, ესენია: თაფლი, თაფლის დისტილატი, თაფლის ძმარი, ფუტკრის რძე, ფუტკრის ცვილისაგან დამზადებული სანთლები და სუვენირები.
თავდაპირველად, მეფუტკრეობის შესწავლა და ფუტკრის ყოლა მხოლოდ ოჯახისთვის მეფუტკრეობის პროდუქტების ხელმისაწვდომობისათვის მოაზრებოდა. მეფუტკრეობა ,,ვოლდ ვიჟენის” პროექტის ფარგლებში დავიწყეთ, ამ ორგანიზაციამ დიდი წვლილი შეიტანა ჩვენს განვითარებაში.
რის გამო გაჩნდა იდეა, რომ აღნიშნული პროდუქტები დაგემზადებინათ?
ფუტკრის, ამ საოცარი მწერის საოცარმა სიყვარულმა მოგვანდომებინა, საფუტკრე მასშტაბური გაგვეხადა და უფრო სიღრმისეულად შეგვესწავლა ეს დარგი. პირველად მხოლოდ თაფლი ვაწარმოეთ, რამაც დიდი მოწონება დაიმსახურა, გამოჩნდნენ შეძენის მსურველები და მათი რიცხვი დღითი-დღე იზრდებოდა, ამით მოტივაცია მოგვეცა, რომ ყველა მსურველი ჩვენი პროდუქტით დაგვეკმაყოფილებინა და, რაც მთავარია, შეგვეთავაზებინა ნატურალური პროდუქტი.
ამ მიმართულებით, კონკურენციას როგორ შეაფასებთ?
მიუხედავად მაღალი კონკურენციისა, ბაზარზე ჩვენ მოვახერხეთ და მოვიპოვეთ მომხმარებლის ნდობა და სიყვარული. ჩვენი მომხმარებელი დარწმუნებულია, რომ თაფლი, რომელსაც ის იძენს, არის სუფთა და მასში არ არის სხვადასხვა დამაბინძურებელი და ანტიბიოტიკი. ფუტკრის სწორი მოვლა-პარტრონობა განაპირობებს ჯანსაღი პროდუქტის შექმნას, რასაც, ვფიქრობ, წარმატებით გავართვით თავი.
შემდეგ იყო ფუტკრის რძე და ცვილის სუვენირები, რამაც მრავალფეროვნება შესძინა ჩვენს საოჯახო წარმოებას. ასე, ნელ-ნელა გავხდით უფრო მრავალფეროვანი ასორტიმენტის მქონე, რაც გავაერთიანეთ ,, გოლეულა”-ს ბრენდის ქვეშ. „გოლეული“ ძვ. ქართული სიტყვაა და ფიჭიან თაფლს ნიშნავს.
რამ განაპირობა „გოლეულა”-ს წარმატება?
ბრენდის პოპულარობას განაპირობებდა სხვადასხვა ქალაქში მოწყობილი გამოფენები და ღონისძიებები, რამაც შეგვმატა უამრავი ახალი მომხმარებელი, რომელთა უმრავლესობასთან შეგვიძლია, თამამად ვთქვათ, დაგვამეგობრა კიდეც, ამგვარად, ჩვენ შევქმენით ახალი ტიპის ურთიერთობა, რომელიც მხოლოდ მყიდველი და გამყიდველი არ არის, ეს არის უფრო მეტი…
ბედნიერებაა, როცა მხოლოდ ჩვენს თაფლს ელოდებიან წლიდან-წლამდე და ჩვენსავით ხარობენ ყოველი ახალი პროდუქტის შემატებისას. საახალწლოდ დიდი მოწონება დაიმსახურა სასაჩუქრე ნაკრებებმა, რომლებსაც ინდივიდუალურად ვაკომპლექტებდით – გემოვნების და შესაძლებლობის გათვალისწინებით. გვაქვს ასევე თაფლიანი ქვევრი და თაფლის დისტილატი ცვილის ბოთლში, რომლებსაც უმეტესად უცხოელი სტუმრებისთვის ან საზღვარგარეთ წასაღებად იძენენ. მსურველები გვიკავშირდებიან საქართველოს ყველა რაიონიდან და მათ ვაწვდით სხვადასხვა გადამზიდი კომპანიის საშუალებით.
,,გოლეულა” ნათელი მაგალითია იმის, რომ საქმის სიყვარულითა და დაუღალავი შრომით ყველაფის მიღწევაა შესაძლებელი.
