ქართველი მომღერალი, როსტომ საგინაშვილი არცთუ ისე დიდი ხნის წინ, 81 წლის ასაკში გარდაიცვალა. ჩვენ კი, ქართველებს საამაყოდ დაგვიტოვა მის მიერ, ილია ზაქაიძესთან და საქართველოს ხალხური სიმღერისა და ცეკვის სახელმწიფო დამსახურებულ ანსამბლთან ერთად შესრულებული “ჩაკრულო” რომლის ჩანაწერიც 1977 წელს კოსმოსურმა ხომალდმა – “ვოიაჯერმა“, ოქროს ფირფიტით, მზის სისტემაში გაიტანა. დიდებული ადამიანების მარადიულად ცოცხლობენ, მაგრამ იმისთვის, რომ მათ შესახებ მომავალ თაობებს, მთელი პლანეტის მცხოვრებლებს ჰქონდეს ინფორმაცია, ჩნდება სხვადასხვა იდეა.
“ჩაკრულოს” მომღერალი ბოთლების ნაკრები დიდი პროექტის ნაწილია, რომლისთვისაც ძალიან ბევრი გააკეთა როსტომ საგინაშვილი შვილმა, თამარ საგინაშვილმა და მისმა ოჯახმა. საინტერესოა, როგორ იქნა შესაძლებელი იდეის ხორცშესხმა და რა იყო ძირითადი სირთულეები – “თბილისი თაიმსს” თამარ საგინაშვილი ესაუბრა.
“ყოველთვის გვინდოდა, მამას სახელზე რაიმე გაგვეკეთებინა. სამწუხაროდ, სულ ცოტა დრო იყო დარჩენილი “ჩაკრულოს” მომღერალი ბოთლების ნაკრების გამოშვებამდე, მაგრამ მამა გარდაიცვალა. ახლა უფრო მეტად გვაქვს სურვილი, რომ ეს ყველაფერი გაგრძელდეს და ამ მიმართულებით ძალიან ბევრს ვაკეთებთ.
ეს ბოთლები გახლავთ ერთერთი შემადგენელი იმ დიდი პროექტის, რომელსაც ჰქვია “სიმღერის და ღვინის სახლი “ჩაკრულო”. ის მამას სახლში გაკეთდება. მამას აქვს უნიკალური ფოტოალბომი. 2 000-მდე ფოტო გაციფრულია უკვე. ამისთვის უზომოდ მადლობელი ვართ გურჯაანის მუნიციპალიტეტის ხელმძღვანელობის და გურჯაანის მაჟორიტარის დავით სონღულაშვილის , რომლებიც ყოველმხრივ ხელს უწყობენ კულტურულ საგანმანათლებლო პროექტებს რეგიონში. ეს ყველაფერი გახლავთ ერთი დიდი ჯაჭვის რგოლები.”
როგორც თამარი გვიამბობს, იდეას საფუძვლად ედო, რომ, მათ შორის, უცხოელებისთვის ყოფილიყო ხელმისაწვდომი ქართული სიმღერის შესახებ რაც შეიძლება მეტი ინფორმაცია.
“როდესაც ჩვენთან უცხოელები ჩამოდიან – მათი რიცხვი კი ძალიან დიდია – ფაქტობრივად, ქართული სიმღერის შესახებ ბევრს ვერაფერს იგებენ. არადა, ჩვენი კულტურის ერთერთი უმნიშვნელოვანესი ნაწილია ქართული სიმღერა. როგორც ცნობილია, “ჩაკრულო” გაშვებულია კოსმოსში, ასევე, იუსენკო-ს არამატერიალური კულტურის ნუსხაშია შეტანილი როგორც “ჩაკრულო”, ისე – ქვევრის ღვინო. სწორედ ამიტომ გავაერთიანეთ ისინი. ჩვენ გვინდოდა. უცხოელებისთვის (არამხოლოდ) მიგვეწოდებინა ის ინფორმაცია, რაც ამ პატარა ყუთებზე დაეტეოდა. იდეაც სწორედ ეს გახლდათ, რომ ისინი გაცნობოდნენ კოსმოსთან დაკავშირებული ფაქტს. ყუთში მოთავსებულია მცირე ზომის სამი ბოთლი. ბოთლსაც და ყუთსაც აქვს კოდი. როგორც კი დაასკანერებ, მაშინვე ირთვება “ჩაკრულო”, გადადის ჩვენ მიერ გაკეთებულ სპეციალურ საიტზე – სადაც ყველა ენაზე არის შესაბამისი ინფორმაცია. აქ დევს ერქომაიშვილის ინტერვიუ და უამრავი სხვა რამ.”
თამარი ხაზს უსვამს იმ სირთულეებს, რომლებიც პროექტის განხორციელებისას გადალახეს. ის აღნიშნავს, რომ არავის სჯეროდა, თუ იდეა რეალობად იქცეოდა.
“აღნიშნული იდეა ნოემბრის დასაწყისში მოგვივიდა. მისი განხორციელება და კი აბსოლუტურად ჩემი მეუღლის დამსახურებაა. გვეუბნებოდნენ – რომ ვერ ვიშოვიდით პატარა ბოთლებს, მათი თავსახურების მოძიებაც რთული იქნებოდა. ასევე, პატარა ყუთებიც. უმეტესაც, გვეუბნებოდნენ, რომ ეს არ გამოგვივიდოდა. თუმცა, ორი თვის თავზე ჩვენ გვქონდა უკვე გამზადებული პროდუქტი. ეს ყველას ძალიან გაუკვირდა და ბევრმა შემოგვთავაზა პარტნიორობა.”
ბოლოს კი, დიდებული მომღერლის შვილი, თამარ საგინაშვილი ამბობს, რომ ეს პროექტი თანადგომისა და მისი მნიშვნელობის დანახვის შედეგად განხორციელდა. ძალიან დაგვიდგნენ გვერდში ღვინის კომპანიები, რადგან პატარა ბოთლები მართლა არ შემოდის. ვისაც რა შეეძლო, იმით დაგვეხმარა. ეტიკეტთაც დაკავშირებითაც აბსოლუტურად დიდი ხელშეწყობა გვქონდა. თუ ადამიანები ერთმანეთს გვერდით დავუდგებით, ყველაფერი განხორციელებადია.
მასალა მოამზადა : მარიამ ტიელიძემ
