“საერთოდ რომ შეწყდეს ქვეყანაში რუსული ბენზინის შემოტანა, თავისუფლად არის შესაძლებელი მისი ჩანაცვლება” – ექსპერტი

საწვავზე ფასის ზრდა ერთერთია იმ პრობლემებს შორის, რომელიც ბოლო პერიოდში ჩვენს ქვეყანაში აქტიურად განიხილება. რა გახდა ამის მიზეზი და, დღევანდელი რეალობის გათვალისწინებით, რა პროგნოზების გაკეთება არის შესაძლებელი – საკითხის შესახებ “თბილისი თაიმსს” ეკონომიკის ექსპერტი, გიორგი ცუცქირიძე ესაუბრა.

“ზოგადად, საწვავზე ფასის ზრდა, რაც დღეს საქართველოში შეინიშნება, დაკავშირებულია მთლიანად საერთაშორისო ბაზარზე საწვავის არნახულ გაძვირებასთან – დაწყებული 24 თებერვლიდან, როდესაც რუსეთი უკრაინაში შეიჭრა. ამან გამოიწვია არა მხოლოდ ნეგატიური მოლოდინები, არამედ – მიწოდების ჯაჭვების წყვეტა. ჩვენ ვხედავთ, რომ თუ თუნცაც 24 თებერვალს 91 დოლარი იყო ბარელი ნავთობის ფასი, უკვე ამ პერიოდიდან დაიწყო ზრდა და 6 მარტს უკვე იყო პიკზე ასული – 123 დოლარი. ეს გახლდათ ისტორიული მაქსიმუმი. მართალია, შემდეგ უკვე შეინიშნებოდა გარკვეული ვარდნის პერიოდი, ჩამოვიდა ფასი 96 დოლარამდე, თუმცა, შემდეგ ფასმა ისევ დაიწყო ზრდა. ამ კვირაშიც გაიხსნა აწევით. ყველაფერი, სამწუხაროდ, განაპირობებს ნეგატიურ პროგნოზებს”, – განმარტავს ექსპერტი,
როგორც ცუცქირიძე აღნიშნავს, საქართველო მთლიანად არის დამოკიდებული იმპორტირებულ საწვავზე.
“ჩვენ მთლიანად ვართ დამოკიდებული იმპორტირებულ საწვავზე, ჩვენ არ ვართ მწარმოებლები. თუ საწვავზე ფასის ზრდა გაგრძელდა, ეს კი, გარკვეულწილად, მიმდინარე ომზეა დამოკიდებული, ბუნებრივია, ეს ჩვენს ქვეყანაშიც აისახება ბენზინის ფასზე. ბარელი ნავთობის ფასი პირდაპირ არის ბმაში საცალო ბენზინზე. გაზრდილია, ასევე, გადამამუშავებელი ბენზინის ფასი. როცა სვამენ კითხვას – რატომ იზრდება საქართველოში საწვავის ფასი – იმიტომ, რომ ეს არის გადამამუშავებელი ბენზინი. ეს დამოკიდებულია იმაზე, თუ მსოფლიო ბაზარზე ნედლ ნავთობზე რა ფასია. ეს არის მიზეზები და არაფერ შუაშია საუბრები იმის შესახებ, თითქოს, არის გარიგებები ბენზინის შემომტან კომპანიებს შორის,
ჩვენს ბაზარზე რუსული ნავთობის წილი არ არის ძალიან მაღალი – 15-16%. ჩვენი ბაზრის წამყვანი მომწოდებელი გახლავთ რუმინეთი – 52 %. მერე მოდის ბულგარეთი. აზერბაიჯანი, თურქმენეთი. ასევე, მომწოდებელია, ნაწილობრივ, თურქეთიც. აქედან გამომდინარე, იმის თქმა, რომ რუსული ბენზინის მოწოდება საცალო ქსელებში იწვევს გაძვირებას, არ არის სწორი. საერთოდ რომ შეწყდეს ქვეყანაში რუსული ბენზინის შემოტანა, თავისუფლად არის შესაძლებელი მისი ჩანაცვლება.
არის კიდევ ერთი საკითხი – რა უნდა გააკეთოს მთავრობამ. აქ არის ორი შეხედულება – მთავრობამ უნდა მოახერხოს აქციზის განაკვეთის განულება და მეორე – მოხდეს დამატებითი ღირებულების შემცირება ნავთობპროდუქტებზე. სანამ ასეთი გაურკვეველი სიტუაციაა და ფასი არ არის დაკორექტებული, ამ პერიოდში რაიმე გადაწყვეტილების მიღება არის არასწორი”, – განმარტავს გიორგი ცუცქირიძე.