ტექნიკურ უნივერსიტეტში კრიმინალისტიკის ლაბორატორია ამოქმედდა. როგორც „თბილისი თაიმსს“ განათლების სამინისტროდან აცნობეს, აღნიშნული ლაბორატორიის ანალოგი ამიერკავკასიაში არ არსებობს.
სტუდენტებისთვის განკუთვნილი თანამედროვე ლაბორატორია დღეს, საქართველოს განათლებისა და მეცნიერების მინისტრმა თამარ სანიკიძემ, საქართველოს იუსტიციის მინისტრმა თეა წულუკიანმა და შინაგან საქმეთა მინისტრის მოადგილემ ალექსი ბატიაშვილმა მოინახულეს.
განათლების სამინისტროს ცნობით, კრიმინალისტიკის ლაბორატორიის შექმნისა და ფუნქციონირების აუცილებლობა იმ ფაქტორმა განაპირობა, რომ ბოლო წლებში დანაშაულის გახსნისა და გამოძიების პროცესში კრიმინალისტიკური ტექნიკა, ტაქტიკა და მეთოდოლოგია ნაკლებად გამოიყენებოდა. შედეგად, სასწავლო დაწესებულებებში შემცირდა ინტერესი კრიმინალისტიკის მიმართ და ერთ დროს სტუდენტისათვის მეტად საინტერესო და მიმზიდველმა საგანმა მეორე პლანზე გადაინაცვლა.
“ზემოაღნიშნული გარემოებების გათვალისწინებით, სტუ-ის აკადემიურმა საბჭომ, საქართველოს განათლებისა და მეცნიერების სამინისტროს მხარდაჭერით, მიიღო გადაწყვეტილება სამართლის დეპარტამენტში შექმნილიყო კრიმინალისტიკის თანამედროვე ლაბორატორია, რისთვისაც 70 000 ლარი გამოიყო. ლაბორატორიის ტექნიკური აღჭურვილობის შეძენა საქართველოს შინაგან საქმეთა სამინისტროს თანადგომით გახდა შესაძლებელი და იგი ანალოგიურია აშშ-ის გამოძიების ფედერალური ბიუროს კრიმინალისტიკის ლაბორატორიაში არსებული აღჭურვილობისა”, – აცხადებენ სამინისტროში.
მათივე განმარტებით, ლაბორატორიის დანიშნულებაა: საბაკალავრო და სამაგისტრო პროგრამით გათვალისწინებული კრიმინალისტიკის კურსის თეორიული სწავლებით მიღებული ცოდნის გაღრმავება ლაბორატორიული კვლევებითა და პრაქტიკული უნარ-ჩვევების გამომუშავებით; პროფესიული სწავლების საფეხურით ჩარიცხულ სტუდენტთა მომზადება კრიმინალისტიკის სპეციალობით; სხვა სასწავლო დაწესებულებებთან თანამშრომლობა სპეციალური ლაბორატორიული კვლევებისა და პრაქტიკული გამოცდილების მიღების თვალსაზრისით.
ღონისძიების ფარგლებში, სტუმრებმა ასევე დაათვალიერეს სასამართლო დარბაზი იმიტირებული პროცესების ჩასატარებლად და სამართლის კლინიკა, სადაც სამართლის ფაკულტეტის სტუდენტები, რომელთაც გააჩნიათ შესაბამისი ცოდნა, იურიდიულ საკითხებზე კონსულტაციას უწევენ იძულებით გადაადგილებულ პირებს და ტექნიკური უნივერსიტეტის მოსამსახურეებს.
14.11.13
