ხელოვანი, რომელზეც ამ მასალაში გიამბობთ, საკუთარი შემოქმედებითი ისტორიის წერას ბავშვობიდან იწყებს. თუმცა, არა ისე – როგორც ეს ყველა ბავშვს ახასიათებს. ის გაცილებით პროფესიონალურად, ფიქრისა და საჭიროების შესაბამისად ქმნიდა და ქმნის დღემდე.
თეონა ფოფხაძისთვის სხვადასხვა დანიშნულების, ლამაზი და მიმზიდველი ნივთების შექმნის პროცესი დიდი სიამოვნებაა. საკუთარი გარემოს გასალამაზებლად შექმნილი ნივთები, გარკვეული პერიოდის შემდგომ, სხვებისთვისაც გახდა საინტერესო. “თბილისი თაიმსს” თეონა თავად ესაუბრა.
ზოგადად, დეკორატიული ნივთები, ასევე, ამ ნივთების დამზადება ბავშვობიდან ძალიან მომწონდა. სიამოვნებას მგვრიდა თავად მზადების პროცესი და შემდგომ – მისთვის სხვადასხვა დანიშნულების გამოძებნა.
კონკრეტულად ჩარჩოების გაფორმება ორი წლის წინ დავიწყე. თავდაპირველად, ამას განტვირთვისთვის ვაკეთებდი. მას შემდეგ, რაც ინტერესი სხვებისგანაც წამოვიდა, გადავწყვიტე – ჩემი მოკრძალებული ნივთები სხვებისთვისაც გამეზიარებინა. მათ დასამზადებლად ვიყენებ ყველაფერს – ნაჭერს, ქვებს, ბისერებს, ძაფებს, სხვადასხვა მცირე დეტალებს.
რა იყო თქვენი პირველი ნაბიჯები საკუთარი ნამუშევრების გაცნობისა და შემდგომ უკვე რეალიზებისთვის?
პირველ ეტაპზე, საკუთარი სივრცის გასალამაზებლად და პოზიტივის შესატანად გადავწყვიტე, ჩემი მოკრძალებული ორანჟერია გამეხალისებინა პატარა, ლამაზი ქოთნებით და დეკორით. სასურველ ფასში ადგილობრივ ბაზარზე გამიჭირდა ნივთების შოვნა და გადავწყვიტე, რამდენიმე მოდელი საზღვარგარეთიდან შემომეტანა. მოგვიანებით კი, მივიღე გადაწყვეტილება, ეს ყველაფერი სხვებისთვისაც გამეხადა ხელმისაწვდომი. ამის გამო, მათ შევთავაზე მცირე ბიუჯეტური დეკორი, რაც გაულამაზებდათ ინტერიერს და ხალისს შეიტანდა ყოველდღიურობაში. ამ მოტივით შეიქმნა ონლაინ მაღაზია “მერეთია შოპი”. ონლაინ მაღაზიამ 2021 წლის ივნისში დაიწყო ფუნქციონირება და ნელ-ნელა ვიხვეწებით, ვსწავლოთ და ვცდილობთ განვითარებას.
რა გეგმები გაქვთ – თუ ფიქრობთ, რომ სხვა სახის ნამუშევრებიც დაამატოთ?
სამომავლოდ ვაპირებთ, მომხმარებელს შევთავაზოთ ადგილობრივი ნაწარმის კერამიკის ნივთები და ხელნაკეთი ჩარჩოების ბევრად დიდი ასორტიმენტი. ამისთვის ჩვენი გუნდი აქტიურად მუშაობს.
