როდესაც საქმე საჩუქრის შერჩევას ეხება, ჩვენ არაერთი დეტალის გათვალისწინება გვიწევს. საბოლოოდ, ის ადრესატის გემოვნებასა და სურვილს უნდა შეესაბამებოდეს, რაც უფრო პერსონალურია საჩუქარი, მით უფრო მეტ ემოციასთან არის დაკავშირებული ჩუქების პროცესი. “ბრიკოლაჟი” მომხმარებლებს სთავაზობს სურნელოვან სანთლებს, რომლებიც ზოდიაქოს ნიშნის მიხედვით მზადდება. “თბილისი თაიმსს” მარიამ ხაჭაპურიძე და ანი ელიზბარაშვილი ესაუბრა.
საიდან გაჩნდა იდეა, დაგემზადებინათ ზოდიაქოს ნიშნის, სურნელოვანი სანთლები?
ჩვენი სანთლების პატარა ბიზნესი ბავშობის ოცნების ასრულებას გავდა. ჯერ კიდევ სკოლის პერიოდში გვიყვარდა საკუთარი ხელით დამზადებული საჩუქრები და, ალბათ, ყველა დაგვეთანხმება, როდესაც საქმე დაბადების დღის საჩუქარს ეხება, ბევრი ფიქრი გვიწევს. ამიტომ გადავწყვიტეთ, შეგვექმნა ისეთი ხელნაკეთი სანთელი, რომელიც გააერთიანებდა არაერთ იდეას (სიმყუდროვე, თბილი ნათება, საოცარი სურნელი, ზოდიაქოს სიმბოლო და სასარგებლო ინფორმაცია ეტიკეტზე).
რისგან ამზადებთ მათ?
ჩვენი სანთელი მზადდება 90% პარაფინით, 10% სტეარინითა და სურნელოვანი ეთერზეთებით. თავდაპირველად, განვიხილავდით, გამოგვეყენებინა ვეგანური სოიოს ცვილი, თუმცა, იმპორტის შემთხვევაში (საქართველოში სოიოს ცვლი არ იწარმოება), არსებული ფასი მინიმუმ 3-ჯერ გაიზრდებოდა. ჩვენი მთავარი მიზანი კი იყო, რომ “ბრიკოლაჟი” საქართველოს ბაზარზე ყველასთვის ხელმისაწვდომი ყოფილიყო.
ბევრი დაინტერესდა თქვენი პროდუქციით?
საკმაოდ, მოთხოვნამ მოლოდინს გადააჭარბა. ძალიან გვახარებს ის ფაქტიც, რომ არაერთი ლოიალური მომხმარებელი გვყავს და კმაყოფილი მომხმარებლების უკუკავშირები კიდევ უფრო მეტ მოტივაციას გვაძლევს.
სხვა თემატიკის სანთლების დამზადებას თუ გეგმავთ?
რა თქმა უნდა, არ ვაპირებთ ერთ თემატიკაზე გაჩერებას. გვაქვს არაერთი ძალიან საინტერესო იდეა, რომელსაც ჩვენი გამომწერები ძალიან მალე იხილავენ. თუმცა, უნდა აღინიშნოს ისიც, რომ რაც გამოგვარჩევს სხვა სანთლების სტარტაპებისგან, ჩვენი თემატიკა შენარჩუნებული იქნება და იტრიალებს ასტროლოგიის გარშემო.
