არცთუ ისე დიდი ხნის წინ, გორის რაიონში ბლის ინტენსიური ბაღი გაშენდა. აღნიშნული კომპანია “ჩერი.ჯი“-მ განახორციელა. მისი დამფუძნებელი, გიორგი მელაძე “თბილისი თაიმსთან” საუბრისას აღნიშნავს, თუ როგორ გადაიდგა პირველი ნაბიჯები, რა ეტაპზეა ბაღი ახლა და რა სამომავლო გეგმები აქვს მას.
“შევისწავლეთ ბაზარი და ვნახეთ, რომ საქართველოში ბლის წარმოება საკმაოდ დაბალია, ატამსა და ვაშლთან შედარებით. შესაბამისად, გადავწყვიტეთ, რომ გაგვეშენებინა ბლის ბაღი საქართველოში. შევარჩიეთ გორის რეგიონი, სოფელი მეჯვრისხევი. ზოგადად, ვიცით, რომ ბალი ერთერთი საუკეთესო სწორედ გორშია. შემდეგ უკვე მოვიძიეთ პარტნიორები იტალიაში და იტალიური ჯიშის ბალი ჩამოვიტანეთ, ექვსი სხვადასხვა სახეობის. შარშან, ერთი წლის წინ გავაშენეთ ეს ბაღი. ის გაშენებულია 10-11 ჰა-ზე. პრინციპში, ეს იქნება ქართულ-იტალიური ბაღი. ნერგები გახლავთ იტალიური. მთლიანად ბაღი მსხმოიარე იქნება სამ წელიწადში. პირველი, მცირე მოსავალი უკვე წელს გვექნება. ამავე დროს, ჩვენ ჩამოყვანილი გვყავს იტალიელი აგრონომი”, – განმარტავს გიორგი.
რესპონდენტი ხაზს უსვამს, რომ აღნიშნულ ბაღში დამონტაჟებულია თანამედროვე, სეტყვასაწინააღმედგო და სარწყავი სისტემები, რაც ნიშნავს, რომ ის ევროსტანდარტების შესაბამისია.
“ის გახლავთ თანამედროვე ტიპის ინტენსიური ბაღი. დამონტაებულია თანამედროვე, სეტყვასაწინააღმდეგო და სარწყავი სისტემები, ეს ნიშნავს, რომ ბაღი იქნება ევროსტანდარტების შესაბამისი. ცნობილია, რომ იტალია ერთერთი საუკეთესოა ამ სფეროში. შესაბამისად, მოსავალიც იქნება ევროსტანდარტების შესაბამისი.
გორის რეგიონი, უფრო მეტად, ნაგვიანევი ბლისაა. ვფიქრობთ ასევე, რომ დასავლეთ საქართველოშიც გავაშენოთ ბაღები, სადაც უფრო ნაადრევი ბალი შემოდის. დასავლეთ საქართველოში, თავისი კლიმატური პირობებიდან გამომდინარე, ნაადრევი ბალი შემოდის. გეტყვით, რატომ იყო, ამ ეტაპზე, ჩვენთვის პრიორიტეტი ნაგვიანევი ბლის გაშენება – ვფიქრობთ, იქვე გავაშენებთ საწარმოს, სადაც მოხდება აღნიშნული მოსავლის ცივად შენახვა სპეციალიზებულ ცელოფნებში. ჩვენ აქცენტი გვაქვს, რომ სადღაც სექტემბერი-ოქტომბერი-ნოემბერში კიდევ იყოს საქართველოში ბალი. შევინახავთ და მას მოგვიანებით გავყიდით”, – ამბობს გიორგი მელაძე “თბილისი თაიმსთან” საუბრისას.
