ადამიანებს განსხვავებული ინტერესები გვაქვს. მათ შორის, ეს ზოგჯერ დამოკიდებულია ჩვენს გარემოზე, საახლობლო წრეზე, წინაპრებზე… არცთუ ისე იშვიათად გვესმის, როგორ აგრძელებს ოჯახის თუ, უბრალოდ, ერთი კონკრეტული ადამიანის საყვარელ საქმიანობას მისი შთამომავალი. ზოგჯერ – სრულიად მოულოდნელადაც კი. ჩვეულებრივ, ეს ინტერესი მზარდია და დღეს უკვე ბიზნესის ფორმას იღებს. მეფუტკრე გიორგი იონათამაშვილს საქმიანობის საკუთარი ისტორია აქვს. მან “იონას საფუტკრე” დააარსა და დღეს უკვე მთელი საქართველოს მასშტაბით არის ხელმისაწვდომი ბრენდის ჯანსაღი, სასარგებლო და გემრილი პროდუქტი. “თბილისი თაიმსს” გიორგი თავად ესაუბრა.
რამ გამოიწვია მეფუტკრეობით თქვენი დაინტერესება?
იმის მიუხედავად, რომ ჩემი დიდი პაპა – კონსტანტინე იონათამიშვილი იყო პროფესიონალი მეფუტკრე, მე პირადად ფუტკართან კავშირი და არც ცოდნა არ მქონია. დაახლოებით, 4 წლის წინ, პატრიარქის ლოცვა-კურთხევით, სამების საკათედრო ტაძარში ჩატარდა პროფესიული კურსები მეფუტკრეობის მიმართულებით, სადაც მოვხვდი სრულიად შემთხვევით, იქიდან დაიწყო ფუტკრით ჩემი დაინტერესება,
ამის შემდეგ, თბილისიდან გადავედი დუშეთში საცხოვრებლად. ამ კურსების წარმატებით დასრულების შემდეგ, პატრიარქისგან საჩუქრად მივიღე ერთი ოჯახი ფუტკარი. აქედან დავიწყე ჩემი მეფუტკრეობა.
აღნიშნული საქმიანობა თქვენთვის როგორ ჩამოყალიბდა, როგორც ბიზნესი?
თავიდან, მხოლოდ ვფიქრობდი, რომ ოჯახისთვის მქონოდა თაფლი, მაგრამ, საფუტკრის გაზრდასთან ერთად, ამ საქმიანობას შევხედე, როგორც ბიზნესს. ასე ჩამოყალიბდა ბრენდი – “იონას საფუტკრე”. ამჟამად, გვაქვს 2 საფუტკრე აღმოსავლეთ საქართველოში – დუშეთის რაიონი სოფელი ახატანი და დასავლეთ საქართველოში – თერჯოლაში.
როგორ რეალიზდება თქვენი პროდუქცია?
ვაწარმოებთ ფუტკრის თითქმის ყველა პროდუქტს – ჩურჩხელებს, თაფლის არაყს. გვაქვს ონლაინ მაღაზია (საქართველოში ერთერთი ყველაზე პოპულარული. უახლოეს მომავალში გავხსნით ორ მაღაზიას, ამ საქმეში ჩართულია ჩვენი ოჯახი და პლუს – 3 დამხმარე), თბილისში გვაქვს ჩვენი საკუთარი საკურიერო მომსახურება, რეგიონებში ვაგზავნით ფოსტით. სამწუხაროდ, ჩვენს ქვეყანაში მეფუტკრეების ძირითადი მიმართულებაა თაფლის წარმოება, რაც, ჩემი აზრით, მცდარია იმიტომ, რომ ფუტკრის კიდევ ბევრი პროდუქტის წარმოება შეიძლება, რაც თაფლზე ბევრად სასარგებლოცაა და მეფუტკრისთვის შემოსავლიანიც.
გარდა ამისა, რა სერვისს სთავაზობთ მომხმარებელს?
ჩვენ მაქსიმალურად ვიყენებთ ფუტკრის პოტენციალს. ასევე, ჩვენი მიმართულებაა აპიტურიზმი. გვაქვს საქართველოში ერთერთი პირველი აპისახლი, ვიღებთ სტუმრებს როგორც საქართველოდან, ასევე, უცხოეთიდან. მეფუტკრეობის პროდუქტებით და აპისახლით დაინტერესება საგრძნობლად იზრდება, განსაკუთრებით, პოსტკოვიდური მდგომარეობის შემდეგ.
