საოჯახო სასტუმრო, რომლის შესახებაც ახლა გიამბობთ, გურიაში მდებარეობს – საოცარი დიზაინი, მყუდრო გარემო, საინტერესო და მრავალფეროვანი შეთავაზებები მათთვის, ვისთვისაც დროის საინტერესოდ გატარება მნიშვნელოვანია. საუცხოო ინტერიერი სოფლის სითბოსა და თანამედროვეობას თანაბრად ითავსებს. დაკა ბერძენიშვილი, „სკიჯის სახლის“ დამფუძნებელი „თბილისი თაიმსს“ ესაუბრა.
რამდენი ხანია, რაც არსებობს „სკიჯის სახლი“?
ჩვენი საოჯახო სასტუმრო დაარსდა 2017 წელს. მანამდე, ორი წლით ადრე თბილისიდან გურიაში გადმოვედი. „აწარმოე საქართველოს“ პირველი გრანტით დავიწყე ჩირის წარმოება, რომელსაც „სკიჯი“ დავარქვი. სკიჯი ძველი ქართული სიტყვაა, ხმელ ყურძენს, იგივე ქიშმიშს ნიშნავს. როცა აქ დავმკვიდრდით და სახლიც მეტად გავალამაზეთ, დავფიქრდით სტუმრების მიღებაზეც. საოჯახო სასტუმროს სახელზეც ბევრი არ გვიფიქრია, რადგან სწორედ ამ სახლში გაკეთდა პირველად სკიჯი, სახლსაც „სკიჯის სახლი“ დავარქვით.
კონკრეტულად, სად მდებარეობს ის?
სკიჯის სახლი მდებარეობს გურიაში, ჩოხატაურის მუნიციპალიტეტის სოფელ ხიდისთავში. ჩვენი სოფელი განთქმულია იმით, რომ ის არის ნოდარ დუმბაძისა და ანა კალანდაძის სოფელი.
რა იყო მისი დაარსების მიზანი?
მაშინ, როცა ჩვენ ეს საქმიანობა დავიწყეთ, გურია ტურისტულად არ იყო აქტიური მხარე, თუმცა, ძალიან საინტერესო და სანახაობითია. გვინდოდა, თამამად დაგვეწყო საუბარი გურიის ტურისტულ რესურსზე, მის მრავალფეროვნებაზე, იმ მდებარეობაზე – რომელიც მას აქვს – ჩვენგან 50 კილომეტრშია კურორტი ბახმარო, გომის მთა, ასევე, შავი ზღვის სანაპიროები – შეკვეთილი და ურეკი. გვინდოდა, სხვებისთვისაც გაგვეზიარებინა ყველაფერი ის, რაც ჩვენ ასე ძალიან მოგვწონს და გვიყვარს გურიაში. ამით კი ჩვენი წვლილი შეგვეტანა გურიის ტურისტული პოტენციალის წარმოჩენაში.
ამ ეტაპზე, რა სერვისებს სთავაზობს ის მომხმარებლებს?
ამ ეტაპზე, მომხმარებელს ვთავაზობთ კომფორტულ განთავსებას კვებით ან კვების გარეშე. სულ გვაქვს ხუთი დამოუკიდებელი საძინებელი. ასევე, ვთავაზობთ გურული კერძების მასტერკლასებს ძველ „გურულ ქუხნაში“. ცალკე გავიტანეთ კვების სერვისი – სკიჯის სამზარეულო, სადაც სტუმარს შეუძლია, გვესტუმროს გემრიელი სადილისა თუ ვახშმისთვის, რაც მზადდება ადგილობრივი, სეზონური, ეკოლოგიურად სუფთა პროდუქტით. ჩვენი სამზარეულოს მთავარი ინგრედიენტი კი ჩირია, რომლიც გარშემოცაა აგებული ჩვენი საქმიანობის ყველა მიმართულება. ასევე, ვთავაზობთ, მონაწილეობა მიიღონ ჩირის დამზადებაში, რომლის ახალი საწარმო გურული ავთენტური იერსახით დგას ამავე ტერიტორიაზე. გარდა ამისა, შეუძლიათ, ისიამოვნონ სოფლის მდინარეებით, ეზოს ყვავილნარით, იფუსფუსონ ბოსტანში, ხეხილის ბაღებში და შეიგრძნონ სოფლის ცხოვრების ყოველდღიურობა გურულ ოჯახთან თანაცხოვრებით. მოინახულონ ნოდარ დუმბაძის სახლ-მუზეუმი, ესტუმრონ მთისა და ზღვის კურორტებს და მოილოცონ ეკლესია-მონასტრები.
როგორია უცხოელების ინტერესი?
2017 წლიდან მოყოლებული, ჩვენთან სტუმრების უმეტესობა სწორედ უცხოელი იყო. მათ განსაკუთრებთ ხიბლავთ სოფლის ხელშეუხებელი ბუნება, ოჯახური გარემო, ადგილობრივი სამზარეულო, ბოსტანი, პროდუქტი… თუმცა, პანდემიის პერიოდმა მკვეთრად გაზარდა ქართველი ტურისტის რაოდენობა, რაც თავისთავად გვახარებს. რაც დროს გადის და ვაკვირდებით, ვხვდებით რომ სოფელის ტურიზმი ერთნაირად მიმზიდველი და საინტერესო ხდება ქართველი თუ უცხოელი ტურისტისთვის.
