ბათუმისა და ლაზეთის ეპარქიისა და უკრაინის საელჩოს საერთო ძალისხმევით ზაფხულის თვეებში საქართველოს 200-მდე უკრაინელი მოზარდი ეწვევა და საზაფხულო ბანაკში დასვენებას შეძლებს.
აღსანიშნავია, რომ საერთაშორისო საზაფხულო ბანაკი „სამშობლო“ 2008 წელს ქობულეთში დაარსდა ილია მეორის, ბათუმისა და ლაზეთის მიტროპოლიტი დიმიტრისა და ბიზნესმენ ანზორ ქოქოლაძის ფინანსური მხარდაჭერით. საზაფხულო ბანაკი გათვალისწინებულია შშმ ბავშვებისთვის, გარდა ამისა იგი წლების განმავლობაში მასპინძლობდა მოზარდებს აშშ დან და ევროპის სხვადასხვა სახელმწიფოებიდან, ასევე რუსეთიან, უკრაინიდან, საინგილოდან და ფერეიდანიდან.
ბანაკის ბენეფიციარებს შეუძლიათ ჩაერთონ სხვადასხვა სპორტულ და კულტურულ ღონისძიებებში, გარდა ამისა აქვე ისწავლება ქართული ენა და ლიტერატურა, ასევე საქართველოს ისტორია.
სწორედ აღნიშნული ბანაკი უმასპინძლებს 200 უკრაინელ მოზარდს. გთავაზობთ ამონარიდს განცხადებიდან, რომელსაც ბათუმისა და ლაზეთის ეპარქია ავრცელებს:
„წელს ბათუმისა და ლაზეთის ეპარქიის და საქართველოში უკრაინის საელჩოს ერთიანი ძალისხმევით ივლისში გვსურს მოვიწვიოთ დასასვენებლად 200 უკრაინელი მოზარდი.
თანადგომის სურვილი გამოთქვა აჭარის მთავრობამ, ზოგიერთმა ბიზნესმენმა, მათ ვინაობას მოგვიანებით გავახმოვანებთ.
ღმერთს დიდება, ჩვენ მშვიდობა!“
მასალა მოამზადა: თორნიკე ყრუაშვილმა
