დღეს, შეიძლება ითქვას, ნებისმიერი ოჯახის განუყოფელი ნაწილია ის სასესხო ვალდებულება, რომელიც მათ ბანკის მიმართ აქვთ. ჩვეულებრივ, ჩვენ ვთანამშრომლობთ ფინანსურ დაწესებულებებთან და ვცდილობთ, მათთან შევინარჩუნოთ სუფთა ისტორია. სხვა მომსახურებების მსგავსად, გრძელვადიან სესხსაც აქვს როგორც უპირატესობა, ისე – ნაკლი. ამის შესახებ “საზოგადოება და ბანკების” დამფუძნებელი, გიორგი კეპულაძე “თბილისი თაიმსს” ესაუბრა.
“მნიშვნელოვანია, სესხის აღებისას ვადა შერჩეული იყოს ისე, რომ ყოველთვიური გადახდა მოხერხდეს მარტივად და ის იყოს მომხმარებლის შემოსავლის შესაბამისი. შესაბამისად, სესხის ვადაც ამის მიხედვით განისაზღვრება. პირობითად, თუ მოხმარებელი შეძლებს, გარკვეული სესხი ერთ წელიწადში დაფაროს, მაშინ სასურველია, ის მეტი ვადით არ აიღოს. რაც უფრო მეტი ვადით არის სესხი აღებული, საბოლოოდ, გადახდილი თანხა უფრო მეტი გამოდის. ამიტომ, ჯობს, რომ ჩავეტიოთ იმ ვადაში, რაშიც შევძლებთ დაფარვას.
რაც შეეხება, მაგალითად, იპოთეკურ სესხს – ამ შემთხვევაში, როგორც წესი, სესხი შედარებით გრძელვადიანია. ამ შემთხვევაში ისევ მნიშვნელოვანია, გავითვალისწინოთ ყოველთვიური ფინანსური შესაძლებლობები”, – განაცხადა გიორგი კეპულაძემ.
