უნდა მოვახდინოთ სწორი იდენტიფიკაცია – ვინ არის ოლიგარქი, ვინ ერევა პოლიტიკაში თავისი გავლენით, ფულით, ვინ აფინანსებს ტელევიზიებს და ვინ ცდილობს ამ გზით გავლენის მოპოვებას. ამასთან დაკავშირებით უკრაინის კანონი რომ წაიკითხოთ, ზუსტად ახლა მე რასაც ვსაუბრობ, ამას შეეხება. ამიტომ, თქვენ შეიძლება გგონიათ და ძალიან გინდათ, რომ ბიძინა ივანიშვილი იყოს ოლიგარქი, მაგრამ სინამდვილეში ამის მტკიცებულება შეიძლება ბუნებაში არ არსებობდეს, – განაცხადა „ქართული ოცნების“ აღმასრულებელმა მდივანმა მამუკა მდინარაძემ პარტიის ოფისში გამართულ ბრიფინგზე.
მან აღნიშნა, რომ ეთანხმება ამერიკის შეერთებული შტატების ელჩის შეფასებას ბიძინა ივანიშვილთან დაკავშირებით, რომელიც აცხადებს, რომ ივანიშვილი არის ქველმოქმედი და ფილანთროპი. ხოლო თუ მივიღებთ უკრაინაში არსებულ კანონს, რომელიც ოლიგარქიას შეეხება, ვნახავთ, რომ „მთავარი“ არხის დამფინანსებელი არის ოლიგარქი.
„მე ვეთანხმები ამერიკის შეერთებული შტატების ელჩს და ეს ასეა, რომელმაც განაცხადა, რომ ეს ადამიანი არის ფილანთროპი, ეს ადამიანი არის მეცენატი, ქველმოქმედი და მართლაც ასეა. კაცზე ლაპარაკობთ, რომელსაც სამ მილიარდზე მეტი ქველმოქმედება აქვს განხორციელებული ქვეყანაში და თქვენ გინდათ, რომ ქველმოქმედი იყოს ადამიანი, რომელიც გამოვიდა და თქვა – რვაასი დოლარი მქონდა ხელფასი და ოთხასს ქველმოქმედებაში ვხარჯავდიო. ისე მაგას რა ვუთხარიო, როგორც ჩვენთან იტყვიან ხოლმე. რა ოთხასი ქველმოქმედებაში? რომელ ფსკერზე ჩავდივართ, ხვდებით?! არ შეიძლება ასე მსჯელობა. ქველმოქმედს დავარქვათ ქველმოქმედი. ოლიგარქის იდენტიფიცირება მოვახდინოთ. აი, თუნდაც იმ კრიტერიუმების მიხედვით, რომელიც უკრაინას აქვს. იგივე კანონი შეგვიძლია მივიღოთ. ადამიანი, რომელიც თავისი გავლენით, მათ შორის დიდი ფულით ცდილობს გავლენა მოახდინოს კონკრეტულ გადაწყვეტილებებზე, დააფინანსოს ტელევიზიები და ეს გავლენები იყოს არალეგიტიმური, მათ შორის და ა.შ. ასეთი არის თქვენი ტელევიზიის დამფინანსებელი. ბიძინა ივანიშვილი კი არის ქველმოქმედი, მათ შორის, პოლიტიკური ქველმოქმედება განახორციელა 2012 წელს. თქვენ ვინ გაფინანსებთ? თუ სახელს და გვარს იტყვით, თქვენ დაასახელებთ ოლიგარქს. ბრძანეთ, ვინ გაფინანსებთ, თქვენ ტელევიზიას ვინ აფინანსებს? ტელევიზიაში მუშაობთ და არ იცით დამფინანსებელი ვინ გყავთ? ან არ იცით, ან არ ამბობთ, ხომ? ერთიც უბედურებაა და მეორეც“, – განაცხადა მდინარაძემ.
