ბიზნესი, რომელიც არცთუ ისე დიდი ხნის წინ დაიწყო და დეტალები, რამაც მისი წარმატება განაპირობა – ამ მასალაში გაგაცნობთ, რას სთავაზობს სტუმრებს “ეკო ქოხები მესტიაში”. ეკოლოგიურად სუფთა გარემო, სიმშვიდე, სიმყუდროვე – უბრალოდ, საოცარი ხედები – ყველაფერი ერთად, ცხადია, შთამბეჭდავი სანახაობაა. უფრო დეტალურად, “თბილისი თაიმსს” თანადამფუძნებელი, მირანდა აღაპიშვილი ესაუბრა.
რამდენი ხანია, „ეკო ქოხები მესტიაში“ მსურველთათვის ხელმისაწვდომია?
ჩვენი ბიზნესი დავიწყეთ 2019 წლის მაისში. 2019 წლიდან დღემდე აქტიურად ვმასპინძლობთ ადგილობრივ და საერთაშორისო ვიზიტორებს. ბაზარზე წარმატებით ახორციელებს თავის საქმიანობას უკვე მეოთხე წელია.
რა იყო მიზანი, რის გამოც აღნიშნული იდეა გაჩნდა?
აღნიშნული იდეა გაგვიჩნდა მესტიაში ტურიზმის სწრაფი განვითარებისა და ტურისტულ ბაზარზე ახალი შეთავაზების შექმნის მიზნით. 2019 წლამდე ოჯახურ სასტუმროში ვიღებდით სტუმრებს და გვქონდა პოტენციალი და უძრავი ქონებრივი რესურსი, შეგვექმნა მაღალი ხარისხის ადგილობრივ გარემოზე ადაპიტრებული პროდუქტი მესტიის ცენტრიდან 5 – 10 წუთის სავალზე. მესტიაში ჩამოსული დამსვენებელი ეძებს მყუდრო, იზოლირებულ და თვითმყოფად გარემოს. შევეცადეთ, ჩვენი კონცეფცია დაგვეფუძნებინა ბუნებაზე, რადგან ბუნება ჩვენი მთავარი უპირატესობაა. ჩვენი მთავარი მიზანი იყო ბიზნესის ტერიტორიაზე არსებული წიწვოვანი და ფოთლოვანი ხე-მცენარეების შენაჩუნება, აქ ჩამოსული სტუმარი ნახავს არყის, ნაძვის, წიფელის, ფიჭვის ხეებს, ასევე, ვაშლის, მსხლის და სხვა ხილის ბაღს. ჩვენი იდეის განხორციელებისას ხე-ტყე არ გაჩეხილა. მხოლოდ მიწის სამუშაოები და ბუჩქნარისგან ადგილის გასუფთავება განხორციელდა.
ვიფიქრეთ, რომ ეკომეგობრული ტურისტული მომსახურების განვითარება, როგორიცაა “ეკო ქოხები მესტიაში”, მოიზიდავდა ნებისმიერი ასაკის, სქესის თუ სფეროს ინტერესთა ჯგუფებს, ვინც ოჯახთან, მეგობრებთან, საყვარელ ადამიანთან ერთად მაღალმთიან რეგიონში ტყისპირა ხის ქოხებში ღამისთევასა და აქტიურ დასვენებას ანიჭებს უპირატესობას.
რაც უმნიშვნელოვანესია, ვიფიქრეთ, რომ ჩვენ მიერ შექმნილი პროდუქტი მნიშვნელოვანი იქნებოდა ადგილობრივი განვითარებისთვის, რადგან ჩვენთან მოსული სტუმარი თავისთავად ხელს უწყობს მესტიის მუნიციპალიტეტის მოსახლოების შემოსავლების გაზრდასა და რეგიონის პოპულარიზაციას.
დეტალურად, რა სერვისებს სთავაზობთ სტუმრებს?
ჩვენი მომსახურება მდებარეობს მესტიაში, ზღვის დონიდან 1545 მეტრზე, ვთავაზობთ ეკოლოგიურად სუფთა გარემოში ღამისთევასა და დასვენებას.
ჩვენს მიერ შექმნილი ობიექტი მდებარეობს მესტია-ჰაწვალის დამაკავშირებელ საავტომობილო გზის და ჰაწვალის საბაგირო გზის სიახლოვეს, იზოლირებულ ტყიან ადგილას.
ამ ეტაპზე, ჩვენი მომსახურება მოიცავს ერთ ოთხადგილიან და მეორე ხუთადგილიან ხის ხელნაკეთ კოტეჯებს. მოკლევადიან პერსპექტივაში, მზარდი მოთხოვნიდან გამომდინარე, ბიზნესგეგმით გათვალისწინებული გვაქვს მესამე სამადგილიანი მშენებარე კოტეჯის დასრულება 2022 წლის ოქტომბრისთვის, ხოლო მეოთხე ოთხადგილიანი კოტეჯის მონტაჟი – 2023 წლის მაისში. კვების მომსახურების დამატება და სხვა ეკომეგობრული აქტივობების განხორციელება.
როგორია ინტერესი უცხოელების მხრიდან?
ინტერესი უცხოელების მხრიდან განსაკუთრებით მაღალია როგორც ზაფხულის, ასევე – ზამთრის სეზონებზე. აღსანიშნავია, რომ მესტია ოთხსეზონური მთის კურორტია, სადაც შესაძლებელია ზაფხულში ლაშქრობა, ბუნებაში მოგზაურობა და კულტურული მემკვიდრეობის აღმოჩენა, ზამთარში სამთო-სათხილამურო კურორტებზე თხილამურით და სნოუბორდით სრიალი, ფეხით სეირნობა, მუზეუმების მონახულება და ა.შ. უცხოელ მომხმარებელს სხვა მსგავს ობიექტებთან განსხვავებით, ჩვენს მომსახურებაში იზიდავს რამდენიმე მხარე, პირველი, რომელსაც აღნიშნავენ ეს არის ქოხების უნიკალური ადგილმდებარეობა, რადგან ჩვენი ობიექტი მდებარეობს მესტიის ცენტრიდან 5-10 წუთის სავალზე, კვების ობიექტებთან, საბაგიროსა და მუზეუმთან ახლოს მეორე, თვალწარმტაცი ბუნება და სიყვარულით მოწყობილი ქოხები, მესამე, გულთბილი მასპინძლობა, სისუფთავე და მომსახურების მაღალი დონე. სრულყოფილად აღჭურვილი მომხმარებლის საჭიროებებზე მორგებული ხის ქოხები, რომელიც უზრუნველყოფილია ყველა საჭირო ინვენტარით: სამზარეულო, სველი წერტილები, ზამთარში ბუხრები, ცივი და ცხელი წყალი, უფასო ინტერნეტი. ხოლო ეზოში შესაძლებელია კოცონის დანთება და ბარბექიუს მოწყობა.
2021 წელს, ადგილობრივი განვითარების ჯგუფისა და დონორი ორგანიზაციის ფინანსური მხარდაჭერით, ჩვენ დავამონტაჟეთ მზის ჰიბრიდული მიკროელექტრო სადგური, რომელიც კოტეჯებს 24-საათიანი უწყვეტი ელექტროენერგიით უზრუნველყოფს, რაც მნიშვნელოვანი სიახლეა ჩვენი მომხმარებლებისთვის, რადგან მესტიაში ელექტროენერგიის წყვეტილად მიწოდების საფრთხე დგას, ხოლო განახლებადი ენერგიის არსებობა უცხოელ მომხმარებელს იზიდავს როგორც გარემოსდაცვითი, ასევე – უწყვეტი ელექტროენერგიის კუთხით.
საინტერესოა ქოხების დიზაინი – როგორია ისინი?
ქოხები დაპროექტებულია დამფუძნებელების მიერ, რომლებიც არიან ადგილობრივები, გიორგი და ნარიმან ჯაფარიძეები. მათ მიერ ხელით არის შექმნილი თითოეული ქოხის ფასადი და ინტერიერი, საძინებლის ავეჯი, სამზარეულო, აბაზანა. ქოხების დიზაინი, პირველ ყოვლისა, მორგებულია ადგილობრივ ბუნებრივ გარემოსა და მომხმარებლების ინტერესებს. დიზაინში გაერთიანებულია მთის, ბუნებისა და ხის ელემენტები, რაც გარემოს მყუდროს, იზოლირებულსა და უნიკალურს. დიზაინის შექმნასა და ქოხების კეთილმოწყობაში გავიზიარეთ სოციალურ არხებზე განთავსებული გამოცდილება და არსებული მსგავსი ობიექტების დიზაინები.
ქოხების უნიკალურ დიზაინში იგრძნობა, თუ რამდენი სიყვარული და ძალისხმევაა ჩადებული ამ ადგილას. დიზაინის მთავარი კონცეფცია ბუნებრივი იერსახის მაქსიმალურად შენარჩუნება და დამსვენებლებისთვის მყუდრო გარემოს შექმნაა.
