ყოველდღიურად ადამიანები ვეძებთ რაღაც განსხვავებულს, რაც მოგვცემს საშუალებას, განვიტვირთოთ და თავისუფალი დრო საინტერესოდ გავატაროთ. არსებობს საზოგადოების ნაწილი, რომელიც სწორედაც რომ იმაზე ფიქრობს, რა შესთავაზოს სხვებს. როგორც წესი, გამოცდილება მათ აძლევთ შესაძლებლობას, დაამზადონ ისეთი პროდუქტი, რომელიც აქამდე ადგილობრივ ბაზარზე არ არსებობდა. სწორედ ასეთი გამოცდილების საფუძველზე, შეიქმნა “მშვიდი”. დეტალებზე “თბილისი თაიმსს” თამარ მუმლაძე უამბობს.
რამდენი ხანია, რაც „მშვიდი“ მომხმარებელს საკუთარ პროდუქტს სთავაზობს?
ჩვენი კომპანია მომხმარებელმა უკვე 3 წელიწადზე მეტია, რაც გაიცნო, თავდაპირველად, მომხმარებელს თავი გავაცანით „ქრაფთსის“ სახელით. თუმცა, მას შემდეგ, რაც ადგილობრივი წარმოებაზე დავიწყეთ მუშაობა, გადავწყვიტე,თ დასახელებაც ქართული და თემატური შეგვერჩია. ასე შეიქმნა „მშვიდი“ და უკვე მიმდინარე წლის გაზაფხულიდან, „აწარმოე საქართველოს“ მხარდაჭერით, მომხმარებელს პირველ, ქართულ, ადგილობრივი წარმოების, ციფრებით ხატვის კომპლექტებს ვთავაზობთ.
დეტალურად, რას ითვალისწინებს ის?
„მშვიდის“ მთავარი მიზანია, მომხმარებელს შესთავაზოს ანტისტრესული, გასართობი, სარელაქსაციო კომპლექტები, ზრდასრულებისა და მოზარდებისთვის. თითოეული პროდუქტი, საბოლოოდ, იქმნება/იწყობა თავად მომხმარებლის მიერ. ასეთია, მაგალითად, ციფრებით ხატვა, ალმასების მოზაიკა, საკაწრები და მომავალში კიდევ ბევრი სხვა ინოვაციური პროდუქტი. ასევე, მიმდინარე თვიდან დაგვემატა შესაძლებლობა, მომხმარებლებს შევთავაზოთ ციფრებით ხატვის ინდივიდუალური კომპლექტები, რაც გულისხმობს, რომ თქვენ შეგიძლიათ ნებისმიერი, თქვენთვის სასურველი ფოტო თუ ნახატი თავად დახატოთ/გააფერადოთ რიცხვების მიხედვით.
რა მიზანზეა პროდუქტი ორიენტირებული?
ჩვენი თითოეული პროდუქტის მიზანია, მომხმარებელს მოუტანოს სიმშვიდე, გაატარებინოს დრო სასიამოვნოდ და, საბოლოოდ, დაუტოვოს ხელნაკეთი ნივთი, რომელთანაც ახალი მოგონებები დააკავშირებს. მომხმარებლების ემოციები ჩვენთვის უმთავრესია და თითოეული, ახალი კატეგორიის დამატებისას სწორედ ეს არის მთავარი პრიორიტეტი.
საინტერესოა, საიდან გაჩნდა იდეა?
იდეა გაჩნდა ციფრებით ხატვიდან, უკრაინაში მოგზაურობისას ჩემმა ნათესავმა მაჩუქა ციფრებით ხატვის კომპლექტი, საქართველოში დაბრუნების შემდეგ კი დავიწყე მსგავსი პროდუქტის ადგილობრივ ბაზარზე ძიება, თუმცა – უშედეგოდ. საბოლოოდ, მე და ჩემმა მეუღლემ გადავწყვიტეთ, მოცემული პროდუქტი თავად გაგვეცნო და შეგვეთავაზებინა ქართველი მომმარებლისთვის, შემდეგ კი დავიწყეთ მსგავსი შინაარსის მატარებელი სხვა ინოვაციური პროდუქტების ძიება, რასაც დღემდე განვაგრძობთ. დღესდღეობით ჩვენი მთავარი მიზანია, ხელი შევუწყოთ ადგილობრივი წარმოების განვითარებას და მომხმარებელს შევთავაზოთ ინოვაციური, ქართული, ხარისხიანი ნაწარმი.
