ნამდვილად უსასრულოა იდეები, რომლითაც ხელოვან ადამიანებს შეუძლიათ, საოცრებები შექმნან. გემოვნებიანი, დახვეწილი და უცხო ნამუშევრები ყოველთვის იქცევს მომხმარებლის თუ უბრალოდ დაინტერესებული ადამიანის ყურადღებას.
საბა კეკელია ნამუშევრებს ხის მერქნის გამოყენებით ქმნის. ამ რთულ, ამავე დროს, საინტერესო პროცესს, შეიძლება ითქვას, ყოველ წუთს უთმობს. დეტალებზე ის “თბილისი თაიმსს” ესაუბრა.
“სკოლის ასაკიდანვე დაინტერესებული ვიყავი ხელოვნებით. მამა მოღვაწეობს ამ დარგში და დამოუკიდებლად ვცდილობდი, შემესწავლა ე.წ. ინკრუსტაცია. თითოეული ნამუშევარი იქმნება ხის სხვადასხვა ჯიშის მერქნისაგან, ე.წ. (შპონისგან), თავისი ბუნებრივი ფერებით. მუშაობის პროცესში ჩნდება ხოლმე სირთულეებიც, ფანერა თხელი ფენის არის და მტვრევადია, სათუთად მიწევს ყველა დეტალის ამოჭრა. ძალზე დიდი დრო მიაქვს და შრომატევადიც არის. თუმცა, ეს ყველაფერი გამორჩეულია იმით, რომ ამ იშვიათი მიმართულებით საქართველოში დაკავებულია რამდენიმე ადამიანი. აგრეთვე, დაინტერესებული ვარ და ვსწავლობ ტიხრულ მინანქარს”, – ამბობს საბა.
როგორც ის აღნიშნავს, საკუთარი პირველი ნამუშევარი, სრულიად დამოუკიდებლად, 13 წლის ასაკში შექმნა.
“13 წლის ასაკში დამოუკიდებლად შევქმენი პირველი ნამუშევარი. მას შემდეგ დრო და დრო ვვითარდებოდი, თავისუფალ დროს ვკავდებოდი ჩემი შემოქმედებით, რამაც ეს ყველაფერი ჩემი ცხოვრების ნაწილად მიქცია. თუმცა, პროფესიით სტომატოლოგი ვარ. ხელოვნებამ ჩემს ცხოვრებაში ძალიან დიდი გავლენა მოახდინა – იმდენად დამოკიდებული გამხადა, თითოეულ წუთს ვუთმობ ამ საქმიანობას.
მაქვს სახლის
პირობებში მოწყობილი პატარა, მყუდრო კუთხე – ძირითადად, სიმშვიდეში და მუსიკის თანხლებით ვქმნი ნამუშევრებს. ყველა ნამუშევარში ჩემი ემოციები და შინაგანი სამყაროს ნაწილია გადმოცემული. ეს იგრძნობა კიდეც. ყველანაირად ვცდილობ, საზოგადოებამდე მივიტანო ჩემი ჩანაფიქრი, რაც ჩემთვისაც სასიამოვნოა”, – ამბობს საბა კეკელია.
