„მზად ვართ, ბოსნია-ჰერცოგოვინასა და საქართველოს კანდიდატის სტატუსი მივანიჭოთ, როგორც კი რეფორმები შესრულდება“, – ამის შესახებ ევროკავშირის საბჭოს პრეზიდენტმა შარლ მიშელმა „დიდი შვიდეულის“ სამიტის დაწყებამდე გამართულ პრესკონფერენციაზე განაცხადა.
„ეს ომი ახალ ფორმას სძენს ევროკავშირსაც. სულ რამდენიმე დღის წინ, ჩვენს ბოლო შეხვედრაზე შევთანხმდით, რომ უკრაინასა და მოლდოვას კანდიდატის სტატუსი მივანიჭოთ, ასევე მზად ვართ, მივანიჭოთ კანდიდატის სტატუსი ბოსნია ჰერცოგოვინასა და საქართველოს, როგორც კი რეფორმები შესრულდება. ეს არის ისტორიული მომენტი უკრაინისთვის და ევროპის მომავლისთვის“,- განაცხადა მიშელმა.
მისი თქმით, ევროკავშირსა და დიდ შვიდეულს ერთი მიზანი აქვს: რუსეთის ომის მანქანის შეჩერება, და ეკონომიკების დაცვა.
„ევროკავშირი მუდამ იდგება უკრაინელი ხალხის გვერდით და დაეხმარება მას სუვერენიტეტისა და ტერიტორიული მთლიანობის დაცვაში. ჩვენი მიზანია დავიცვათ ჩვენ საერთო დემოკრატიული ღირებულებები“, – განაცხადა მიშელმა.
