“ყოველ წუთს ყველაფერი იცვლება. ამიტომ, დღეს შეუძლებელია იმის პროგნოზი, რა იქნება ექვსი თვის შემდგომ”, – ამის შესახებ ისტორიკოსმა, მიხეილ ბახტაძემ “თბილისი თაიმსთან” საუბრისას განაცხადა.
ისტორიკოსმა იმ პარამეტრების შესახებ ისაუბრა, რის მიხედვითაც შეფასდება – მიიღებს თუ არა საქართველო ევროკავშირის წევრობის კანდიდატის სტატუსს.
“დამოკიდებულია საერთაშორისო ვითარებაზე, უკრაინაში მიმდინარე ომზე – რამდენად მალე მოხდება რუსეთის გატეხვა, დამარცხება თუ არა – დასუსტება მაინც, გარდა ამისა, როგორ განვითარდება მოვლენები ქვეყნის შიგნით, რა ვითარება იქნება ჩვენს ხელისუფლებასა და საზღვარგარეთ ჩვენს მოკავშირეებს, პარტნიორ სახელმწიფოებს შორის… ბევრი ფაქტორი იქნება გასათვალისწინებელი. ჩვენ შეგვიძლია, ვთქვათ, რა გვინდა – გავაგრძელოთ სვლა ევროპისაკენ”, – განაცხადა მიხეილ ბახტაძემ.
ცნობისთვის, ევროპულმა საბჭომ გადაწყვიტა, რომ მისცეს კანდიდატის სტატუსი უკრაინასა და მოლდოვას. ასევე, საბჭომ გადაწყვიტა, აღიაროს საქართველოს ევროპული პერსპექტივა და მზადაა, მას კანდიდატის სტატუსი მიანიჭოს, როგორც კი დასახული პრიორიტეტები შესრულდება.
