“დღეს ცოტა ძნელია, იყო გამორჩეული” – ამ სიტყვებით იწყებს “თბილისი თაიმსთან” საუბარს ხელოვანი, რომელსაც ახლა გაგაცნობთ. ანასტასია ღონღაძე 17 წლისაა, ის თბილისის კლასიკურ გიმნაზიაში სწავლობს. ამზადებს სხვადასხვა ტიპის აქსესუარებს და სამკაულებს ქალბატონებისთვის. “ტასიას სამკაულები” – ასე ჰქვია მის “სახელოსნოს”.
“დღეს ცოტა ძნელია, იყო გამორჩეული, მაგრამ ყოველთვის ვცდილობ, დავამზადო ისეთი ნივთი, რომელიც მე მომწონს და მეც სიამოვნებით ვიხმარდი. ყოველი აქსესუარი თუ სამკაული ჩემი გემოვნებით მზადდება.
სანიშნეების დამზადების იდეა არც ისე დიდი ხნის წინ მომივიდა. ძალიან მიყვარს კითხვა და პირველი სანიშნეც სწორედ ჩემთვის დავამზადე. მიმაჩნია, რომ საკმაოდ ორიგინალური და უცხო აქსესუარია. მინდა გითხრათ, გაამართლა და ჩვენს მომხმარებელში დიდი მოწონებით სარგებლობს. ამ ეტაპზე, ყველაზე დიდი მოთხოვნა სწორედ სანიშნეებზე გვაქვს”, – ამბობს ანასტასია და გვიყვება, როგორ იქმნება მისი ნამუშევრები. ასევე, ის ხაზს უსვამს, რას ნიშნავს ოჯახის მხარდაჭერა მისთვის.
“ჩემს ნამუშევრებს სახლში ვქმნი, ჩემს ოთახში. საკმაოდ სასიამოვნო პროცესია, მიხარია, ჩემი ნამუშევრები სხვასაც რომ მოსწონს. სამუშაო პროცესში მთელი ოჯახი მყავს ჩართული. ყველა შეძლებისდაგვარად მეხმარება და გვერდში მიდგას. ის, რომ ჩემმა ამ გატაცებამ ასეთი სერიოზული სახე მიიღო, ჩემი ოჯახის დიდი დამსახურებაა. მშობლები და და-ძმები ჩემი დიდი გულშემატკივრები არიან.
გარდა ამისა, ხშირად ვმონაწილეობ სხვადასხვა გამოფენა-გაყიდვებში”, – ამბობს ანასტასია ღონღაძე.
