ადამიანი, რომელსაც ახლა გაგაცნობთ, ხელოვნების საოცარ ნიმუშებს ქმნის. ის ამზადებს მაკეტებს, რაც რთული პროცესია, რადგან ხარისხსა და მაქსიმალურ სიზუსტეს გულისხმობს. ნათია ლელაშვილი თვითნასწავლია და სამომავლოდ ამ პროფესიის შესწავლას აპირებს – “რადგან საკუთარი საქმე ვიპოვე. აუცილებლად განვვითარდები და განვავითარებ საქმეს, რომელიც ძალიან მიყვარს, მასში დიდ სიყვარულსა და შრომას ვდებ”.
“ორი წლის წინ, ჩემს შვილთან თამაშის დროს დავიწყე საახალწლო სახლების კეთება. ჩემი ნამუშევრები ხალხისთვის რომ გამეცნო, გავაკეთე “ფეისბუქ გვერდი” – რომელსაც ხალხის დიდი გამოხმაურება მოყვა. პირველი კაფე “ვერდეს” მაკეტის შეკვეთა მივიღე, რომელიც წარმატებით შევასრულე განსაზღვრულ ვადებში, დამკვეთისგან დიდი მოწონება დაიმსახურა.
შემდეგ, კომპანია “ლეგი”-ს კორპორატიული შეკვეთა შევასრულე – საახალწლო სახლების დიდი რაოდენობა, რომელიც სხვადასხვა მუნიციპალიტეტსა და პარტნიორ კომპანიებში გაიგზავნა საახალწლო საჩუქრად. რაც შეეხება ყველაზე დიდ პროექტს – ეს გახლავთ საქართველოს ეროვნული უნივერსიტეტის მაკეტი, რომელიც ახლახან დავასრულე – ის რექტორისთვის საჩუქრად დამიკვეთეს და უნივერსიტეტის ლობიში არის განთავსებული”, – ამბობს ნათია.
ის გვიყვება, რა სირთულეებთან არის დაკავშირებული მაკეტების მზადების პროცესი. ასევე, ხაზს უსვამს, თუ რა ნამუშევრებს ქმნის, გარდა მაკეტებისა.
“ნამდვილად შრომატევადი საქმეა, სრულად ხელით მზადდება ყველა დეტალი, ვიყენებ უმაღლესი ხარისხის მასალას. სახლების დამზადება მოთხოვნისამებრ დავიწყე ბავშვებისთვის მულტფილმის გმირებით, რომელსაც აქვს განათება და დეკორატიულ სანათად გამოიყენება. ასევე, ვამზადებ სხვადასხვა დიზაინის დეკორატიულ სანათებს ინტერიერის შესაბამისად.
გაზრდილი მოთხოვნის მიხედვით, დავამზადე საახალწლო სოფლების და შობის დეკორაციები. მრავალფეროვანი არჩევანის მიუხედავად, დამკვეთის ყველა იდეის შესრულება არის შესაძლებელი.
ჩემი ნამუშევრების ძირითადი მომხმარებლები არიან როგორც ფიზიკური პირები, ასევე, კომპანიები და ბედნიერი ვარ, რომ მათი რიცხვი იზრდება და მათ ნდობას ვიმსახურებ”, – ამბობს ნათია ლელაშვილი.
