“როცა ქვეყანა იმპორტ დამოკიდებულია, ფასს განსაზღვრავს მსოფლიო ბაზრის ფასები, კონიუნქტურა და ვალუტის კურსი” – ექსპერტი

რძის პროდუქტების მწარმოებლები შემოდგომიდან ნაწარმის გაძვირებას პროგნოზირებენ. ამის შესახებ კომპანიების ხელმძღვანელები BM.GE-სთან საუბრისას აცხადებენ.
საკითხს “თბილისი თაიმსთან” ეკონომიკის ექსპერტი, იოსებ არჩვაძე აფასებს.
“ზოგადად, მაკროეკონომიკა არის ფასების ზრდისა და ინფლაციის ისტორია. თვეების მიხედვით რომ გადავავლოთ თვალი, ფასების შემცირების წილი არის, დაახლოებით, 6-8 პროცენტი, დანარჩენი ყოველთვის მზარდია. ეს არ არის ქართული ფენომენი – გახლავთ, ზოგადად, გლობალური მოვლენა. ამერიკის შეერთებულ შტატებშიც კი ზოგიერთი საუკუნის მანძილზე ფასებმა 19-ჯერ მოიმატა. ახლა უნდათ ამერიკელებს ცხრამეტი დოლარი იმ საქონლის შესაძენად, რისთვისაც ერთი საუკუნის წინ მხოლოდ ერთი დოლარი იყო საჭირო”, – განმარტავს ექსპერტი.
როგორც იოსებ არჩვაძე აღნიშნავს, როდესაც ქვეყანა არის იმპორტდამოკიდებული, ყველაფერს განსაზღვრავს მსოფლიო ბაზრის ფასები, კონიუნქტურა და ვალუტის კურსი.
“როდესაც ქვეყანა არის იმპორტდამოკიდებული, ფასს განსაზღვრავს მსოფლიო ბაზრის ფასები, კონიუნქტურა და ვალუტის კურსი. არაერთი ფაქტორია, რომელიც გავლენას ახდენს ფასების ჩამოყალიბებაზე. ამის საწინააღმდეგოდ ბრძოლის ერთერთი საუკეთესო საშუალებაა ადგილობრივი წარმოება, რეალური სექტორის ზრდა და ექსპორტის მატება სწრაფი ტემპით. ეს მოგვცემს საშუალებას, რომ ქვეყანაში მეტი უცხოური ვალუტა შემოვიდეს და ამის საფუძველზე გამყარდეს ეროვნული ვალუტა. ეროვნული ვალუტის გამყარება მოგვცემს საშუალებას, იმპორტული საქონლის ფასი ეროვნულ ვალუტაში იყოს რაც შეიძლება იაფი. აღსანიშნავის ლარის გამყარება – 3.45-დან 2.90-ის ფარგლებში ჩამოვიდა. შესაძლოა, ეს ტენდენცია კიდევ გაგრძელდეს. ეს ჩვენ დაგვეხმარება ფასების სტაბილურობის შენარჩუნებაში და, ხელსაყრელი პირობების შემთხვევაში, ფასების კლების მხრივაც შეიძლება, გადაიდგას გარკვეული ნაბიჯები”, – ამბობს იოსებ არჩვაძე.