ემოციური მიზეზი, რაც ამ კონკრეტულ საქმიანობას დაედო საფუძვლად და შედეგი, რამაც იდეის ავტორს ძალიან დიდი ენთუზიაზმი შემატა – ჩვენ ახლა სენსორულ-განმავითარებელ სათამაშო წიგნებზე გიყვებით. დასაწყისში, იზა სამუშიას ვერც კი წარმოდგინა, რომ მისი პროდუქტი ასეთ ფართო მასშტაბებზე გავიდოდა და შეთავაზება ასეთი მოთხოვნადი იქნებოდა. IziCrafts – ეს მისი ფერადი საქმიანობის სახელწოდებაა. “თბილისი თაიმსს” ის თავად ესაუბრა.
დეტალურად რომ გვითხრათ, რას ამზადებთ პატარებისთვის?
ვამზადებ სენსორულ-განმავითარებელ სათამაშო წიგნებს. ეს არის ერთგვარი მრავალფუნქციური სათამაშო, რომლის მიზანია, სხვადასხვა სათამაშო აქტივობის დახმარებით, განავითაროს პატარების როგორც ნატიფი მოტორიკა, ისე – გონებრივი უნარ-ჩვევები, რომელიც აუცილებელია პატარა ადამიანის ჩამოყალიბების პროცესში.
რატომ გადაწყვიტეთ, ამ მიმართულებით შეგეთავაზებინათ პროდუქტი საზოგადოებისთვის?
სიმართლე გითხრათ, ვერც წარმომედგინა, რომ ჩემი წამოწყება შეფუთულიყო პროდუქტის სახით და საზოგადოების მხრიდან მოთხოვნაც გაჩენილიყო. იდეა გაჩნდა მაშინ, როდესაც ჩემს სამეგობროში მომრავლდნენ პაწაწინები და, შესაბამისად, მათთვის საჩუქრის შერჩევის სიხშირეც გაიზარდა. სამწუხაროდ, ქართულ ბაზარზე ბავშვებისთვის ეკოლოგიურად სუფთა, საინტერესო, ორიგინალური და ამავდროულად გასართობი საჩუქრის მოძიება საკმაოდ რთულია, ან არაბუნებრივად ძვირი სიამოვნებაა. ჩემთვის საჩუქრის შერჩევა ძალიან საკრალური პროცესია და მოვალეობის მოხდას არ უდრის არცერთ შემთხვევაში, მით უმეტეს, თუ მოზარდებზეა საუბარი. შესაბამისად, რაღაცნაირად ბუნებრივად მოხდა, რომ გადავწყვიტე – თავად შემექმნა ალტერნატივა. ალბათ, ყველა პატარა ბავშვის ოცნებაა, იმ ზღაპარში ამოყოს თავი, რომელსაც ძილის წინ უყვებიან, ასე დაიბადა იდეა, რომ ზღაპარი ყოფილიყო ხელშესახები და მატერიალურად აღქმადი. პირველად ჩემი მეგობრის პატარისთვის მოვიფიქრე აქტივობები, რომლებიც გადავწყვიტე, წიგნივით ამეკინძა. რატომღაც მივიჩნიე, რომ წიგნებთან ურთიერთობის დაწყების საუკეთესო საშუალება თამაში იქნებოდა. ასე განსხეულდა ჩემი იდეა, რომელსაც მოყვა მეორე, მესამე და, ჩემდა გასახარად, საზოგადოების მხრიდან ძალიან დადებითი გამოხმაურებაც.
რით გამოირჩევა თქვენი ნამუშევრები სხვებისგან?
ეს ისეთი კითხვაა, რომელზეც პასუხი ალბათ ობიექტურმა დამკვირვებელმა უნდა გასცეს, თუმცა, შემიძლია გითხრათ, რომ თითოეული ნამუშევარი, რომელიც შემიქმნია, ჩემთვის არის უდიდესი პასუხისმგებლობა. ჩემი არცერთი ნამუშევარი არ ჰგავს წინას იმიტომ, რომ თითოეული მათგანი შეიქმნა კონკრეტული ადამიანისთვის, რომელსაც აქვს განსხვავებული ინტერესები და განსაკუთრებული საჭიროებები.
საინტერესოა, რა არის თქვენთვის ყველაზე მნიშვნელოვანი, როდესაც მათ ქმნით?
ემოციები, რომლებსაც პასუხად ვიღებ, არის უმთავრესი ამ საქმეში. მერწმუნეთ, თუ ამ ყველაფერს შეხედავთ, როგორც უბრალოდ სამოქალაქო ბრუნვაში ჩასაშვებ პროდუქტს, არ გამოგივათ. შესაბამისად, მუშაობის პროცესში ჩემთვის ყველაზე მნიშვნელოვანია – მჯეროდეს, რომ დრო და ენერგია, რომელსაც ვხარჯავ, აუცილებლად გარდაიქმნება დადებით ემოციად. ყოველთვის ვცდილობ, რომ ყველა დეტალს მოვეკიდო განსაკუთრებული ყურადღებით, თითქოს, ამ ყველაფერს ჩემივე თავის პატარა ვერსიისთვის ვქმნიდე. საბოლოოდ, გამოდის ის, რაც გამოდის და, საბედნიეროდ, საპასუხო დადებითი ემოციებით მუდმივად სავსე ვარ.
რას გვეტყვით მომხმარებლებზე – დიდია მათი რიცხვი?
მე ვიტყოდი, რომ საჭიროება არის ძალიან დიდი. ერთმნიშვნელოვნად უნდა გამოვყო შეზღუდული შესაძლებლობების და განსაკუთრებული საჭიროებების მქონე პატარები, რომლებისთვისაც მათ ინდივიდუალურ საზრუნავებს და საჭიროებებს მორგებული სათამაშოები არის პრაქტიკულად მიუწვდომელი. სიმართლე რომ გითხრათ, ამ საჭიროებების მასშტაბები და მნიშვნელობა მხოლოდ მას შემდეგ გავიაზრე, რაც ჩემი წიგნები ფართო საზოგადოებას გავაცანი და მათმა გამოხმაურებებმა მოაღწია ჩემამდე, რისიც, გულწრფელად რომ გითხრათ, ძალიან მრცხვენია. ამავდროულად, მიხარია, რომ რაღაც ძალიან ძალიან უმნიშვნელო, იმედი მაქვს – დადებითი როლი მეც შევასრულე ამ ადამიანების ცხოვრებაში.