ადამიანებს მიზანი გვაძლევს შესაძლებლობას, გავხდეთ მეტად აქტიურები და ძლიერები საკუთარ საქმიანობაში. ასეა ყველა მიმართულებით. ამ მასალაში ნინო ნამგალაურს გაგაცნობთ. ის ნამუშევრებს თექისგან ქმნის, რომლებსაც, როგორც თავად ამბობს, ფერებად აკინძული ყველა ემოცია მოაქვს. აქვს პედაგოგიური გამოცდილება. თუმცა, მთავარ სურვილად ყოველთვის ჰქონდა, გაეხსნა საკუთარი არტ სკოლა. დღეს ეს მიზანი უკვე მიღწეულია და თან – ძალიან წარმატებით. დეტალებზე ის “თბილისი თაიმსს” ესაუბრა.
“ჩემი ნამუშევრები იქმნება მატყლისგან. ეს არის ძველი ქართული ტრადიციული ტექნოლოგიით დამუშავებული მასალა, სადაც ხდება მატყლის მოთელვით მისი მხატვრული დამუშავება.
2005 წელს ჩავაბარე თანამედროვე ხელოვნების და შოუ-ბოზნესის აკადემიაში მოდელიორ-დიზაინერის ფაკულტეტზე. ესკიზების შექმნის დროს თითქოს რაღაც მაკლდა, მინდოდა – მომხმარებლისათვის შემეთავაზებინა რაღაც ახალი, ორიგინალური, ქართული და, რაც მთავარია, ექსკლუზიური, რის საშუალებასაც თექის შესწავლა მაძლევდა, სწორედ მაშინ შევისწავლე თექა და იმის შემდეგ არ გავჩერებულვარ”, – ამბობს ნინო.
როგორც ხელოვანი აღნიშნავს, მთავარი საკუთარ თავზე მუშაობა და განვითარებაა.
“მოთელვის პრინციპი ყველა ერთია, მთავარია საკუთარ თავზე მუშაობა და განვითარება, დაუღალავი შრომის შედეგად, მივიღე ახალი მოდელების განსხვავებული ხაზი, რაც მნახველზე დიდ შთაბეჭდილებას ახდენს. თექაზე მუშაობა საკმაოდ შრომატევადია, მაგრამ საბოლოოდ აუცილებლად კმაყოფილი დარჩებით.
თექის გარდა, ვმუშაობ თოჯინებზე, ტიხრულ მინანქარზე, დეკორატიულ დიზაინზე და ა.შ. ზოგადად, მე მაქვს პედაგოგიური გამოცდილება. ვასწავლი სხვადასხვა სკოლაში, კოლეჯში, ასევე, მასტერკლასებს ვუტარებ უცხოელ ტურისტებს. მაგრამ ჩემი ძირითადი ოცნება იყო, გამეხსნა საკუთარი არტ სკოლა. რამდენიმე თვეა, რაც წარმატებით მივიწევთ წინ. მყავს სხვადასხვა ასაკის მოსწავლეები.
ჩემი მთავარი ინსპირაციის წყარო იყვნენ ჩემი შვილები, რომლებიც პანდემიის დროს დამოკიდებულნი გახდნენ გაჯეტებზე. ვხედავდი, როგორ უფერულდებოდა მათი ბავშვური სამყარო. მას შემდეგ, რაც არტ სკოლა გავხსენი, რადიკალურად შეიცვალნენ და დავინახე, როგორ დაბრუნდნენ ლამაზი, ბავშვური ფერები”, – გვეუბნება ნინო ნამგალაური და აღნიშნავს, რომ ახლა მისთვის მთავარია, იყოს სხვადასხვა ლოკაციაზე და ბევრმა შეძლოს, გახდეს ისეთი ფერადი, როგორებიც მისი ნამუშევრებია.
