ბოლო პერიოდში საქართველოში კოვიდის დადასტურებული შემთხვევების მატების ტენდენცია შეინიშნება. ამ ფონზე, სულ უფრო და უფრო მეტი ადამიანი აკითხავს კლინიკას ჰოსპიტალიზაციის საჭიროებით. თუმცა, ბევრს მიაჩნია, რომ კოვიდი უკვე ორგანიზმში მსუბუქად მიმდინარეობს და განსაკუთრებული ყურადღება საჭირო არ არის. საკითხის შესახებ „თბილისი თაიმსს“ პროფესორი, ექიმი-თერაპევტი, მაკა ბულეიშვილი ესაუბრა.
„შეიძლება ვთქვათ, რომ კოვიდი ახლა შედარებით მსუბუქად მიმდინარეობს, მაგრამ არ მსუბუქ მიმდინარეობასაც შეიძლება, გარკვეული კატეგორიისა და სხვადასხვა ასაკობრივ ჯგუფებში, მოჰყვეს გართულებები, ფაქტი სახეზეა, მიდგომა თავიდანვე არის არასათანადო – რომ არის ძალიან მსუბუქი და ამიტომაა, რომ ამ დღეებში უკვე უამრავი კოვიდდადებითი პაციენტი შემოდის ჰოსპიტალიზაციის საჭიროებით. მაქსიმალურად დიდი ყურადღებით უნდა ვიყოთ, რადგან მიუხედავად იმისა, რომ მსუბუქი მიმდინარეობა ახასიათებს, თუ დიდი რაოდენობის პაციენტი იქნება, მსუბუქ მიმდინარეობასაც ხომ უნდა სწორი მართვა – ბევრი ორსულია, ხანდაზმული… ასაკობრივ ჯგუფში მე მხედველობაში მყავს ის ადამიანები, რომლებსაც აქვთ თანმხლები ქრონიკული დაავადებები“, – განაცხადა ბულეიშვილმა.
მან აღნიშნა, რომ ჩვენ გვაქვს ანტივირუსული პრეპარატი, “პაქსლოვიდი”, რომელმაც ძალიან კარგი შედეგები მოგვცა.
„დღევანდელი მონაცემებით, მე ვშიშობ, რომ 2-3 კვირაში მაჩვენებელი უნდა იყოს ძალიან მაღალი. უბრალოდ, ბევრი პაციენტის მართვა იქნება რთული, თორემ ჩვენ ვირუსის მართვა უკვე ძალიან კარგად ვიცით“, – განაცხადა მაკა ბულეიშვილმა.
