საქართველოს მთავრობა ხორბლისა და ქერის ექსპორტს მიმდინარე წლის 4 ივლისიდან 2023 წლის 4 ივლისამდე კრძალავს. ამის შესახებ გარემოს დაცვისა და სოფლის მეურნეობის მინისტრმა, ოთარ შამუგიამ განაცხადა. საკითხს “თბილისი თაიმსთან” საუბრისას ხორბლისა და ფქვილის მწარმოებელთა ასოციაციის დირექტორი, ლევან სილაგავა აფასებს.
“მსოფლიოში ხორბლის სერიოზული კრიზისია. ეს იმიტომ, რომ უკრაინის პორტები არის დაკეტილი, სამხედრო სტრატეგიიდან გამომდინარე. შესაბამისა, უკრაინის ხორბალი მსოფლიოს დაკლებული აქვს. ეს ქვეყანა არის მსოფლიოში ხორბლის ერთერთი უმსხვილესი მწარმოებელი. აქედან გამომდინარე, მას მერე, რაც ომი დაიწყო, უკრაინისგან მსოფლიოს ხორბალი ვერ მიეწოდება. შესაბამისად, ფასები არის ძალიან მაღალი. გარკვეულწილად, ყველა ქვეყანა ამ კრიზისს პასუხობს.
ძალიან ბევრმა სახელმწიფომ, რომელსაც ხორბალი მოჰყავს, ან შეზღუდა ან შეწყვიტა ექსპორტი. ასე, მაგალითად, სომხეთიდან ხორბლის გამოტანა აკრძალულია. ასევე მოიქცა აზერბაიჯანიც. რამდენიმე დღის წინ გავრცელდა ინფორმაცია, რომ ყაზახეთმა, რომელიც ხორბლის ერთერთი მთავარი მიმწოდებელია, შეზღუდა გატანა. იმავეს აკეთებს რუმინეთი, ხორვატია… გასაკვირი არ უნდა იყოს, ჩვენმა სახელმწიფომაც რომ იგივე გავაკეთა. საქართველოს არ აქვს დიდი რაოდენობის ხორბალი. მხოლოდ ჩვენი მოხმარების 10-12 პროცენტი”, – განაცხადა ლევან სილაგავამ.
