მიმდინარე წელს – დიდი ალბათობით, სექტემბერში, საქართველოს მოსახლეობას ექნება საშუალება, სასტუმრო „ქვევრების“ მომსახურებით ისარგებლოს. გამორჩეული დიზაინი, ქართულ მოტივებზე დაფუძნებული იდეა, კომფორტული სერვისი – ეს ყველაფერი ძალიან მიმზიდველად ჟღერს.
„თბილისი თაიმსს“ პროექტის დამფუძნებელი, გიორგი კლდიაშვილი ესაუბრა.
„ვიფიქრეთ, რომ კარგი ბიზნესიდეა გამოვიდოდა და ქართულ მოტივებზე დაფუძნებული ბიზნესის წამოწყება იქნებოდა საკმაოდ წარმატებული. ტერიტორიას რაც შეეხება – ეს გახლავთ თელავის მუნიციპალიტეტის სოფელი შალაური, სამი ჰექტარი. ნახევარ ჰექტარზე ოდნავ მეტზე გაშენებულია ვენახი, უშუალოდ სასტუმროსთან. დამტკიცებული იყო ორი ბიზნესპროექტი – ერთი არის “ქვევრები” და შენობები და კიდევ ერთი შენობა გვაქვს სამომავლოდ გათვლილი. ქვევრის ტიპის 20 კოტეჯი უკვე აშენებულია. ასევე, ერთი შენობა, რომელშიც 17 ოთახია გათვლილი, რესტორანი, ბარი, ტერასა, საკონფერენციო დარბაზი, სამზარეულო, მისაღები, აუზი, ვაკეთებთ ასევე გარე სამზარეულოს“, – განმარტავს გიორგი და აღნიშნავს, რომ უახლოეს გეგმებში საქართველოს სხვა ტერიტორიების ათვისება არ შედის – “თუმცა, ვნახოთ, ბიზნესი როგორ წავა და რა გეგმები გამოიკვეთება“.
