“დღეში, დაახლოებით, 1 000 შემთხვევაა და 10 პროცენტია დადებითობის მაჩვენებელი. შესაბამისად, აშკარაა, რომ კოვიდის დადასტურებულმა შემთხვევებმა მკვეთრად მოიმატა. თუმცა, კარგი ის არის, რომ გართულებული შემთხვევა შედარებით ნაკლებია, ვიდრე ეს იყო წინა ტალღების დროს. ძირითადად, მიმდინარეობს ფილტვების დაზიანების გარეშე. თუმცა, ასევე, არის მაღალი ტემპერატურის შემთხვევები”, – ამის შესახებ ინფექციონისტმა, მაია ბუწაშვილმა “თბილისი თაიმსთან” საუბრისას განაცხადა.
ინფექციონისტმა კოვიდრეგულაციების შემოღების შესახებაც ისაუბრა.
“რეგულაციებს რაც შეეხება – ახლა ისეთი სეზონი და კლიმატური პირობებია, რომ ადამიანები, მათ შორის, პირბადეს მაინც არასწორად გამოიყენებენ, როგორც ეს იყო შარშან, ამ დროს. არაჰიგიენური გამოყენება კიდევ უფრო მეტ პრობლემას ქმნის.
ჯერჯერობით, არ ღირს ღია სივრცეებში პირბადის ტარების მოთხოვნა. დახურულ სივრცეებში, სადაც ბევრი ადამიანია, კარგი იქნება, თუკი დაწესებულებები და ორგანიზაციები შიდა რეგულაციებს აამოქმედებენ და ადამიანები თვითკონტროლს დააწესებენ. ჩვენ გვახსოვს, როდესაც მოქმედებდა კოვიდშეზღუდვები, მაშინაც კონტროლის მექანიზმი, ფაქტობრივად, არ იყო. ამიტომ, არ მგონია, ამის აღდგენა რამენაირად შედეგის მომტანი იყოს”, – განაცხადა მაია ბუწაშვილმა.
