ძალიან ლამაზი, ფერადი და ხარისხიანი ნამუშევრები, რომლებსაც ახლა გაგაცნობთ, ნინო ქოჩორაშვილის გემოვნებით იქმნება. საკუთარი ფანტაზიით მოქარგული სილამაზეები ხელოვანს დროის საუკეთესოდ და ნაყოფიერად გატარების საშუალებას აძლევს. გარდა იმისა, რომ ის თავისივე იდეებით ქმნის ნაქარგებს, ასევე, ითვალისწინებს მომხმარებლების სურვილებს. დეტალებზე ნინო ქოჩორაშვილი „თბილისი თაიმსს“ ესაუბრა.
„ჩემი ნამუშევრები იქმნება ატლასისა და აბრეშუმის ლენტებით. ვიყენებ ორგანზას და მულინეს ძაფს. ქარგვის პროცესში სირთულე არ არსებობს, ზოგადად, თუ გიყვარს – რასაც აკეთებ, ის საქმე. მთავარია, მოვიძიო ხარისხიანი პრინტი და ლენტები. ხშირ შემთხვევაში, მიგზავნიან სხვა ქვეყნებიდან. ვქარგავ როგორც შეკვეთით, ისე – საკუთარი ფანტაზიით. დიდხანს ვფიქრობ თემაზე, შემდეგ გადამაქვს ტილოზე და ვქარგავ“, – ამბობს ნინო.
როგორც ის აღნიშნავს, ქარგვა 5 წლის წინ დაიწყო. ამ მხრივ, ის თვითნასწავლია.
„ქარგვა 5 წლის წინ დავიწყე. ვარ თვითნასწავლი. სოციალურ ქსელში ვნახულობდი მასტერკლასებს, ვუმატებდი ჩემს ფანტაზიას და ასე იქმნებოდა ნაქარგი. შეკვეთების მიღება თვითონ მსურველებმა მოითხოვეს. ასე ჩავერთე მქარგველების უნიჭიერესთა გუნდში“, – ამბობს ნინო ქოჩორაშვილი და ხაზს უსვამს, რომ მისთვის, როგორც საბავშვო ბაღის აღმზრდელისთვის, მნიშვნელოვანია, ეხერხებოდეს ხელსაქმე.
„მე საბავშვო ბაღის აღმზრდელი ვარ და ვალდებული ვარ, მეხერხებოდეს ხელნაკეთი ნივთების, აპლიკაციების კეთება. ძალიან მომწონს ქვილინგი, მაქვს არაერთი ნამუშევარი.ზოგადად, ხელგარჯილობა ჩემი ჰობია. ვგეგმავ გამოფენის მოწყობას. ნებისმიერ მსურველს ხშირად ვთავაზობ ფასდაკლებასა და საჩუქრებს. ადამიანების გახარება ჩემი სისუსტეა – ორმაგად ბედნიერი ვარ, როდესაც მადლიერი, დასაჩუქრებული ადამიანის გახარებულ სახეს ვხედავ და ჩემი ნამუშევრები ულამაზებს სახლს“.
