“ხორბლის მოსალოდნელი მოსავალი არის მაღალი. ეს ასე, ძირითადად, რუსეთშია. პლუს, უკრაინის პორტები ომის გამო იყო დაკეტილი და ისინი ამუშავდა – მსოფლიო თანამეგობრობის ძალისხმევით, უკრაინიდან ხორბალი გამოვიდა. ამან ბაზარს მისცა საშუალება, რომ გაზრდილიყო ხორბლის მიწოდება მსოფლიოში. შესაბამისად, ეს ორი ძირითადი ფაქტორია. აქედან გამომდინარე, ფასებმა დაიწია. ფაქტობრივად, ჩვენთანაც ფასებმა იკლო. რუსეთში გაიაფდა მცურავი ბაჟი. ამან მისცა საშუალება, გარკვეულწილად, ხორბლის ექსპორტი, პირველი პარტიები, განხორციელებულიყო. კიდევ ველოდებით ფასების კლებას. მაშინ უკვე აზრი ექნება წისქვილკომბინატების სტაბილურ ამუშავებას”, – ამის შესახებ ხორბლისა და ფქვილის მწარმოებელთა ასოციაციის დირექტორმა, ლევან სილაგავამ “თბილისი თაიმსთან” საუბრისას განაცხადა.
როგორც სილაგავამ აღნიშნა, გარდა ამისა, გაიაფდა ფქვილი, მათ შორის, ქართულ ბაზარზე.
“პლუს ამას, გაიაფდა არა მხოლოდ ხორბალი, არამედ – ფქვილი, მათ შორის, ჩვენს ბაზარზე. აგვისტოს დასაწყისში პირველი ხარისხის ერთი ტომარა, 50-კილოგრამიანი ფქვილის ფასი იყო 85 ლარი, დღეს კი არის 76 ლარი.
სანამ რუსეთ-უკრაინის ომი მიმდინარეობს, ყოველთვის არის რისკი იმისა, ჰუმანიტარული დერეფანი იმუშავებს თუ არა.
უნდა აღინიშნოს ვალუტის კურსი. ხორბლის ფასი დგას სამ პარამეტრზე – იმ ქვეყანაში ხორბლის ფასი, საიდანაც მოგვაქვს; ტრანსპორტის ფასი და სავალუტო სტაბილურობა ბაზარზე. უნდა შევხედოთ, როგორ იმუშავებს ამ სამი პარამეტრის ერთობლიობა”, – განაცხადა ლევან სილაგავამ.
