“აზერბაიჯანი არ გაჩერდება, ვიდრე არ მიაღწევს თავისას. მას აქვს შემდეგი ამოცანები – პროგრამა მაქსიმუმი გახლავთ ყარაბაღის ტერიტორიის მთლიანად დაბრუნება, პროგრამა მინიმუმი კი არის სომხეთის იძულება, რომ შესრულდეს ხელშეკრულება, რომელსაც ცეცხლის შეწყვეტის შესახებ მოეწერა ხელი – რუსეთის შუამავლობით (რომელიც სომხეთის მხრიდან გარკვეულ დათმობებს გულისხმობს – კორიდორის გახსნას სომხეთის ტერიტორიაზე). ვიდრე ამას არ მიაღწევს, არ გაჩერდება, მით უმეტეს, აზერბაიჯანი იყენებს საუკეთესოდ (სათავისოდ, ცხადია) შექმნილ გეოპოლიტიკურ ვითარებას, რაც გულისხმობს უკრიანის ტერიტორიაზე მიმდინარე ომს”, – ამის შესახებ “თბილისი თაიმსთან” საუბრისას პოლიტოლოგმა, მამუკა არეშიძემ განაცხადა.
არეშიძემ აზერბაიჯანსა და სომხეთს შორის არსებული დაძაბული ვითარება შეაფასა.
“აზერბაიჯანს ძალიან დიდი მხარდაჭერა აქვს თურქეთის სახით, სომხეთს რუსეთისგან ასეთი მხარდაჭერა არ აქვს.
სიტუაცია არ განიმუხტება. აზერბაიჯანი მთელს მსოფლიოს ასეთ თამაშს შესთავაზებს – “ვიდრე ჩემი არ შესრულდება, არ გავჩერდები”. განმუხტვის შანსი არის ძალიან მცირე. პერიოდული განმუხტვა შესაძლებელია – ცეცხლის შეწყვეტა, მაგრამ შემდეგ ისევ იგივე განმეორდება, რადგან აზერბაიჯანი მაქსიმალურად შეეცდება, თავისას მიაღწიოს”, – განაცხადა მამუკა არეშიძემ.
