“რუსეთს ახასიათებს მუქარისშემცველი ფრაზეოლოგიის გამოყენება, როდესაც მას გაუჭირდება ხოლმე და ცდილობენ, ამით ერთგვარი ფსიქოლოგიური ზემოქმედება მოახდინონ მოწინააღმდეგეზე. ეს მეთოდი მათ კარგად აქვთ ათვისებული ჯერ კიდეც “ცივი ომის” პერიოდიდან, როდესაც საბჭოთა კავშირი არსებობდა”, – ამის შესახებ ანალიტიკოსმა, ზაალ ანჯაფარიძემ “თბილისი თაიმსთან” საუბრისას განაცხადა.
ანალიტიკოსმა ის მუქარისშემცველი განცხადებები შეაფასა, რომლებიც ბოლო პერიოდში რუსეთის ლიდერებისგან ჟღერდება.
“რა დგას ამის უკან – აქ შესაძლებელია, განვიხილოთ ერთი ვარიანტი – მას შემდეგ, რაც რუსეთმა ოკუპირებულ ტერიტორიებზე ე.წ. რეფერენდუმები ჩაატარა, ის დაიწყებს უფრო აქტიურ მოქმედებას, ვგულისხმობ შეტევით ოპერაციებს იმისათვის, რომ ამ ტერიტორიების ის ნაწილები, რომლებიც ჯერ კიდევ უკრაინის კონტროლის ქვეშ იმყოფება, დაუქვემდებაროს რუსეთის კონტროლს. მეორე და ყველაზე ნაკლებადსავარაუდო ვარიანტი არის შემდეგი – როგორც პუტინი იმუქრება, ეს არის ბირთვული იარაღის შეზღუდული მასშტაბით გამოყენება. აქ მათ ამერიკელებისგან მიიღეს პირდაპირი, უშუალო და ძალიან მკაფიო გაფრთხილება, რომ ამ ყველაფერს რუსეთისთვის მოჰყვება კატასტროფული შედეგი. ამიტომ, არ მგონია, რომ რუსეთი ამაზე წავა. ჩემი აზრით, საქმე ეხება უფრო სახმელეთო შეტევით ოპერაციებს, რომელსაც რუსეთი განახორციელებს იმ ახალი რეზერვების ხარჯზე, რომელიც მან ბოლო პერიოდში ბრძოლის ველზე შემოიყვანა.
