“მობილიზაციის გამოცხადების პირველი ტალღა, მეტ-ნაკლებად, დამცხრალია. შესაძლოა, იყოს პატარა კერები, რადგან სრული ეს ტალღა გამოიწვია საზოგადოებაში მოულოდნელობამ. მათ მთელი შვიდი თვის მანძილზე პუტინი და სხვები ეუბნებოდნენ, რომ არ იქნებოდა მობილიზაცია, წვევამდელებს, სავალდებულო სამსახურის მოსამსახურეებს არ წაიყვანდნენ, მოუმზადებელი ხალხი უკრაინაში არ იომებდა, ასევე, ეუბნებოდნენ, რომ ყველაფერი კარგად იყო და სიტუაცია კონტროლდებოდა. თუმცა, რუსეთის საზოგადოებისთვის მოულოდნელად, ჩააბარეს ხარკოვი. გრძელდება უკრაინის შეტევები. ახლახან, ჩააბარეს ლიმანი”, – ამის შესახებ ანალიტიკოსმა, ამირან სალუქვაძემ “თბილისი თაიმსთან” საუბრისას განაცხადა.
როგორც ანალიტიკოსმა აღნიშნა, დღეს ტენდენციები უკრაინის სასარგებლოდაა.
“ტენდენციები უკრაინელების სასარგებლოდაა. განსაკუთრებით – ეს იგრძნობა რიცხვობრივი თვალსაზრისით. ცხადია, ინტერნეტს ვერ კეტავს და ვერ ჩაკეტავს რუსეთი – ადამიანები იღებენ ინფორმაციებს. მაგრამ მაინც ჰქონდათ იმის იმედი, რომ რასაც ხელისუფლება ამბობდა, იქნებოდა სიმართლე. ამიტომ იყო შოკისმომგვრელი ნაწილობრივი მობილიზაციის გამოცხადება.
ამავე დროს, მოსახლეობამ ისიც დაინახა, რომ მობილიზაციას კი დაარქვეს “ნაწილობრივი”, მაგრამ დაიწყეს, ფაქტობრივად, სრული მობილიზაცია, მაგალითად, დაღესტანში გავრცელდა ვიდეოები, რომლებზეც ჩანს, რომ მანქანები დადიან და ხმოვან შეტყობინებებს აჟღერებენ, რომ მამაკაცები, განურჩევლად ასაკისა, უნდა გაწვეულიყვნენ. ალბათ, მიუდგნენ პრიმიტიულად, რომ რაც შეიძლება მეტი გასაწვევი გამოეჭირათ და მიეყვანათ კომისარიატებში. ანუ არაორგანიზებულობამ გამოსვლებს დამატებითი იმპულსი მისცა.
დღეს, ფაქტობრივად, საზღვრებისკენ აღარ არის ისეთი ნაკადები. ეს იყო “პირველი დღეების ეფექტი”. ვინც გასვლა მოასწრო, გავიდა. სანამ მასობრივად მობილიზებულების მსხვერპლი არ წამოვა რუსეთში, ალბათ, ახალ საპროტესტო ტალღას არ უნდა ველოდოთ. თუმცა, ყველაფერი დამოკიდებულია ბრძოლის ველზე ვითარების განვითარებაზე”, – განაცხადა ამირან სალუქვაძემ.