ნოსტალგია, ბავშვობის განსაკუთრებული მომენტების ძიება, წლების წინანდელი განწყობები და ემოციები არის ის, რაც შეიძლება, დროის გასვლის შემდგომ ნებისმიერ დეტალში აისახოს. „ფუსფუსი“ სწორედაც რომ ძველის, ჩვენს მეხსიერებაში არსებულის გაცოცხლებასა და მის გათანამედროვეობას ემსახურება. ნათია ყურშუბაძის იდეამ, კულინარიისადმი მისი სიყვარული ბიზნესად ექცია, გაამართლა და დღეს მისი საქმიანობა უკვე წარმატებულია. საკუთარ ისტორიაზე, დესერტების სიყვარულსა და ჩანაფიქრის განხორციელებაზე ნათია „თბილისი თაიმსს“ ესაუბრა.
„პროფესიით გახლავართ ხელოვნებათმცოდნე იმპრესარიო-მენეჯერი. დღესდღეობით ვარ თვითნასწავლი კონდიტერი და მოყვარული კულინარი.
ტორტების და, ზოგადად, დესერტების მიმართ ჩემი სიყვარული, ბავშვობიდან მომდინარეობს, რადგან გავიზარდე ისეთ ოჯახში, სადაც მუდამ სტუმრიანობა იყო. შესაბამისად, ოჯახის წევრებიც, დედა განსაკუთრებით, არაჩვეულებრივი დიასახლისია და დღემდე მოყოლებული გვანებივრებს თავისი გემრიელობებით. ასევე, მამიდა მყავდა არაჩვეულებრივი კონდიტერი და მისი მომზადებული დესერტების გემოები დღემდე თან დამყვება. სხვათა შორის, მიუხედავად იმისა, რომ საკმაოდ პატარა ვიყავი, დღემდე მახსოვს მისგან ნასწავლი კონდიტერული საიდუმლოებები, რასაც დღეს უკვე ჩემს საქმიანობაში ვიყენებ აქტიურად“.
ამ მხრივ, ცოდნას როგორ იღებთ და სიახლეების ძიების რა მეთოდები გაქვთ?
ეს ყველაფერი უკვე გამოცდილებიდან გამომდინარე მაქვს მიღებული და დღემდე ვსწავლობ, ხან ინტერნეტით, ხანაც წიგნებით, ხან საკუთარი ექსპერიმენტებით. ანუ მუდმივად ვარ ახლის ძიებასა და სწავლის პროცესში. ვფიქრობ, რომ ეს სფერო ამოუწურავია და მუდმივად უნდა ვეძიოთ, ვიექსპერიმენტოთ და ვისწავლოთ კიდეც. დედაც ძალიან დამეხმარა თავისი ძირძველი რეცეპტებითა და რჩევებით, რომლებსაც დიდი სიამოვნებით ვიყენებ და ვთავაზობ „ფუსფუსის“ დამკვეთებს.
„ფუსფუსის“ დაფუძნება კიდევ განაპირობა ბავშვობის გემოების ნოსტალგიამ. სანამ ამ საქმეს წამოვიწყებდი, სულ ძიებაში ვიყავი იმ ბავშვობის გემოების, რითაც გავიზარდე, მაგრამ, სამწუხაროდ თუ საბედნიეროდ, ვერსად ვიპოვე ის, რასაც ვეძებდი.
ამიტომ, ავდექი და გადავწყვიტე, მე თვითონ მიმეგნო ამ გემოებისთვის, სხვაც გამენებივრებინა „ფუსფუსისეული“ ტკბილეულით და ჩემთან ერთად ემოგზაურათ ტკბილ ბავშვობაში. ამ ყველაფერში დიდი წვლილი კი მიუძღვის ჩემს სამზარეულოში „ფუსფუსისადმი“ სიყვარულს.
რით არის თქვენი პროდუქტი განსხვავებული?
ზოგადად, ოდითგანვე მხიბლავს განსხვავებულობა და „ფუსფუსშიც“ ვეცადე, რომ ჩემი ნაწარმი ყოფილიყო განსხვავებული ხელწერის და სხვისთვის ადვილად მისახვედრი, რომ ეს „ფუსფუსისაა“, რასაც ამ წელიწად-ნახევარში, თამამად შემიძლია ვთქვა, რომ მივაღწიე კიდეც. „ფუსფუსის“ ნაწარმი გამოირჩევა როგორც ვიზუალურად, ასევე, გემოებით. არ მოვიხმარ ხელოვნურ დანამატებს, არამედ – უმაღლესი ხარისხის პროდუქტებს, ისეთს, რომ პატარა ბავშვებსაც თამამად შეუძლიათ, მიირთვან. გარდა ამისა, ვიზუალზეც ბევრს ვმუშაობ. არ ვპლაგიატობ და სულ ვცდილობ, რომ საკუთარი იდეებით შემოვიფარგლო. ვფიქრობ, გამომდის კიდეც.
რამდენად ხშირად სთავაზობთ მომხმარებლებს სიახლეებს?
სიახლეები ძალიან მიყვარს და მუდმივად მათ ძიებაში ვარ, ასევე, დამკვეთებიც ძალიან მიწყობენ ხელს ახალ-ახალ აღმოჩენებში. როდესაც პირველად საქორწილო ტორტის შეკვეთა შემომივიდა, დამკვეთს თავიდანვე ვუთხარი, რომ ეს იყო ჩემთვის პირველი და თან ვკითხე: “დარწმუნებული ხართ?!” რაზეც პასუხი მივიღე, 100%-ით და მომცა სრული თავისუფლება.
ვფიქრობ, თუ არ გარისკე, ვერასდროს აღმოაჩენ საკუთარ თავს და გაიგებ საკუთარ შესაძლებლობებს. ასევე, ძალიან დიდ მნიშვნელობას ვანიჭებ ამ საქმეში თავისუფლებას, ეს ძალიან დასაფასებელია დამკვეთებისგან, როდესაც გენდობიან და სრულ თავისუფლებას განიჭებენ, ამიტომაც მიყვარს ყველა მათგანი.
როგორ ფიქრობთ – გაამართლა თქვენმა იდეამ, საყვარელი საქმიანობა გექციათ ბიზნესად?
ჩემი ყოველი შემოქმედების ქვეშ, როდესაც ვტვირთავ „ფუსფუსის“ გვერდზე ნაწარმს, თან ვურთავ სლოგანს, – ჰეშთეგით “ნაფუსფუსარია სიყვარულით” და ეს ტყუილად არ წერია.
თუ საქმის მიმართ სიყვარული არ გვექნება, მისგან არც უნდა გვქონდეს სრულყოფილების მიღების მოლოდინი.
ამიტომ, ყველას ვურჩევ, რომ აირჩიონ ის საქმე, რაც მათ რეალურად უყვართ, თუ უნდათ, რომ ერთდროულად ისიამოვნონ საქმის კეთებით და თანაც მიაღწიონ ჭეშმარიტ წარმატებას. რა თქმა უნდა, გაამართლა ჰობის ბიზნესად ქცევამ.
