Plantastick.ფლანთასთიქ – გახლავთ ჯადოსნური სამყარო ადამიანებისთვის, რომელთათვისაც არსებითად მნიშვნელოვანია ყოველდღიური კონტაქტი ბუნებასთან, ცოცხალ სამყაროსა და ყველა იმ სილამაზესთან, რასაც დედამიწა ადამიანებს გვჩუქნის. მიკრო სამყარო, რომელიც მსურველამდე ტერარიუმების სახით მიდის, მათ რეალობას გაცილებით მშვიდს, სიცოცხლით სავსეს ხდის. იდეის ავტორი და დამფუძნებელია ფლორისტი სოფი ზარაფიშვილი, თანადამფუძნებელი კი ნათია მედვედევი გახლავთ. დეტალებზე “თბილისი თაიმსს” სოფი ესაუბრა.
დეტალურად, რას ითვალისწინებს თქვენი საქმიანობა?
დღევანდელ რეალობაში ნათლად ჩანს, თუ რამდენად მივეჯაჭვეთ ეკრანებს და განვიცდით ბუნებაში სასეირნო დროის ნაკლებობას. ამიტომ, ვიფიქრეთ – შეგვექმნა მინიატურული, ჯადოსნური ტყეები, კლდეები და მთები, რომლებსაც გამჭვირვალე ჭურჭლებში ვათავსებთ; მიკრო სამყარო, რომელიც გაულამაზებს, სიცოცხლეს და ინდივიდუალიზმს შეჰმატებს როგორც სამუაშაო, ასევე – მოსასვენებელ სივრცეს.
საინტერესოა, რამ გამოიწვია ამ მხრივ თქვენი ინტერესი?
17 წლიდან ვარ ფლორისტი და ვვურთიერთობ მცენარეებთან, იდეა – Plantastick*ფლანთასთიქ, რომელზეც დიდ ხანს ვფიქრობდი, მე და ჩემმა, მცენარეებსა და ბუნებაზე შეყვარებულმა მეგობარმა, ნათიამ განვახორციელეთ.
იქიდან გამომდინარე, რომ ადამიანებს არ აქვთ საშუალება, სათანადოდ მოუარონ მცენარეებს, ჩვენ ვიპოვეთ გამოსავალი ტერარიუმების სახით, რომლებიც ყველა ადამიანს აძლევს საშუალებას – ჰყავდეთ მცენარეები შესაბამისი პირობების და სივრცის მოწყობის გარეშე.ჩვენს
ქვეყანაში ამ მიმართულებით როგორია საზოგადოების დაინტერესება?
გვჯერა, რომ რაც უფრო მეტ ინფორმაციას მივაწვდით საზოგადოებას მცენარეებსა და ტერარიუმებთან დაკავშირებით, მათი ინტერესიც გაიზრდება. ჩვენი ერთ-ერთი მთავარი მოტივაციაა საზოგადოებაში ცნობიერების ამაღლება მცენარეებთან ურთიერთობის კუთხით.
ნამუშევრებს საკუთარი გემოვნებით ამზადებთ?
დიახ, ჩვენი ყველა ტერარიუმი უნიკალურია და მის დიზაინს განაპირობებს ის მცენარეები და მასალები რომლებსაც აწყობისას ვიყენებთ. თუმცა, კომპანიების და ინდივიდუალური პირების დაინტერესების შემთხევაში, მათთვის სასურველ დიზაინსაც ვქმნით.
უმთავრესად, ვინ არის თქვენი პროდუქციის მომხმარებელი ?
ყველა ადამიანი, რომელსაც უყვარს მცენარეები და მათ თვალსა და ხელს შუა ჭკნობას განიცდის, მაგალითად, თაიგულის შემთხვევაში – რომელიც თავიდანვე მკვდარი მცენარეებით იწყობა და ვიზუალურადაც ორ დღეში ნადგურდება, მათთვის “ფლანთასთიქს” აქვს იდეალური ალტერნატივა მიკრო სამყაროების სახით, რომელიც დიდხანს გაულამაზებს და შეუქმნის ამაღლებულ განწყობას მფლობელს.
ჩვენი მიზანია, რომ ამ ტერარიუმებმა ყველა ასაკის ადამიანის ცხოვრებაში განსაკუთრებული ადგილი დაიკავოს.
