ხელოვნება, შემოქმედებითობა ნამდვიალდ უსაზღვროა. საზღვრები არ აქვს იდეებს, რომლებიც ჩვენ არჩევანის შესაძლებლობას გვაძლევს. ხელოვანი, რომლის შესახებაც ახლა გიამბობთ, თვითნასწავლია. მიაჩნია, რომ მისთვის ეს ნიჭი სამყაროს საჩუქარია და მაქსიმალურად ცდილობს, ის მრავალმხრივ გამოიყენოს.
ნინო ბერიშვილი ნამუშევრებს არაერთი მასალისგან ქმნის. როგორც ის ამბობს, სხვებისთვის გამოუსადეგარი ნივთები მისთვის იდეების წყაროა. დეტალურად, ნინო “თბილისი თაიმსს” ესაუბრა.
ბუნებით შემოქმედი ვარ. მინდა, მაქსიმალურად გამოვიყენო ეს და ვქმნი, რასაც ბუნება მაძლევს და მჩუქნის, სხვისთვის შეიძლება – გამოუსადეგარი და უსიცოცხლო იყოს, ჩემთვის ეს მასალაა, რითაც ვქმნი ნამუშევრებს: ხე, ქვა, ქაღალდი. ჩემს ყველა ნამუშევარს განსაკუთრებულად ვუფრთხილდები და მიყვარს.
რაც თავი მახსოვს, სულ რაღაცას ვაკეთებდი, ბავშვობიდან დღემდე არ შემიწყვეტია შექმნა, უბრალოდ, წლების მატებასთან ერთად, ეს ნამუშევრებიც დაიხვეწა. რაც დრო გადის, ვხვდები, რომ მეტად ვინტერესდები და მსიამოვნებს ამ საქმის კეთება. მავსებს და მაძლიერებს შინაგანად.
თქვენი ნამუშევრები რით არის განსხვავებული?
ჩემი ნამუშევრები განსხვავდება იმით, რომ არ მეორდება, არის ბუნებრივი მასალით დამზადებული და, რაც მთავარია, ხელნაკეთია. განსხვავდება ყველა ნამუშევარი ერთმანეთისგან ფერით, განწყობით და ხასიათით, ყველა ინდივიდუალურ სახეს ატარებს. ვფიქრობ, ეს არის საინტერესო როგორც ჩემთვის – ასევე, მომხმარებლისთვის.
გარდა ამისა, ხელოვნების სხვა მიმართულებებით თუ ხართ დაინტერესებული?
ხელოვნებას არ აქვს საზღვრები, სხვა მიმართულებებითაც მომისინჯავს ძალები, მაგრამ ამ ეტაპზე მინდა, ვაკეთო ის, რაც ყველაზე კარგად გამომდის და ჩემია. იმდენად მრავაფეროვანია მასალა, რომელსაც ვიყენებ, იმდენად სხვადასხვა გახლავთ სტრუქტურულად დამუშავების პროცესში, რომ მგონია – ყველა ახალი ნამუშევარი ახალი გამოწვევაა.
