ყოველდღიურად ჩვენ შეიძლება, ხელოვნების არაერთი ნიმუში, ხარისხიანი ნამუშევარი ვნახოთ, რომელიც ჩვენს აღტაცებას იწვევს. ზოგიერთი მათგანი ერთმანეთს ჰგავს, ზოგი კი აშკარად განსხვავებული მიმართულებისაა და სრულად გადმოსცემს ავტორის ხასიათს. თუმცა, არსებობს ნამუშევრებიც, რომლებიც ამ ყველაფერზე კიდევ უფრო მაღლა დდგას და ჩვენ უბრალოდ სიტყვები არ გვყოფნის, რომ სწორად გადმოვცეთ ის ემოცია, რაც მათი ხილვისას გვეუფლება. ნინო გაფრინდაშვილის ნამუშევრები სწორედაც რომ ემოციების ზღვაა. ის მათ თექის ძაფისგან ქმნის. “თბილისი თაიმსს” ნინო თავად ესაუბრა.
“ნამუშევრის შესაქმნელად ვიყენებ თექის ძაფს. თექა არის ქართული, რომელიც შედარებით უხეშია და მას სურათების ფონისთვის ვიყენებ, გარდა ამისა, ჩემი მასალაა მირინოსი, რითაც ძირითადი დეტალები კეთდება.
ნათესავთან ვნახე თექით დამზადებული აქსესუარები. დამაინტერესა. მოვიძიე ვიდეოები, ზოგი მათი მეშვეობით და ზოგიც ჩემი ფანტაზიით. დავიწყე სურათების კეთება. პირველი ნამუშევარი დღემდე შენახული მაქვს. მაშინ კმაყოფილი ვიყავი ჩემი თავის და მეგონა, რომ კარგად გავართვი თავი. ახლა კი მეღიმება, როცა ვუყურებ და ვფიქრობ, ადამიანის შესაძლებლობებს არ აქვს საზღვრები. უბრალოდ, სრულყოფილების მისაღწევად ბევრი შრომაა საჭირო”, – ამბობს ნინო და გვიზიარებს, თუ როგორ მიმდინარეობს მათი შექმნის პროცესი და რა სირთულეებთან არის ის დაკავშირებული.
“მუშაობის პროცესი არის ძალიან სასიამოვნო და ამავდროულად შრომატევადი. თუ მხატვარი დასახატად იყენებს ფუნჯს, ჩემი ფუნჯი არის პატარა ნემსი, რომლის მეშვეობითაც იქმნება სურათები.
შემიძლია ყველა ჟანრის ნამუშევრების შექმნა, მაგრამ ბოლო პერიოდში პორტრეტების კეთება უფრო მიტაცებს. სახეები გამოდის ძალიან მეტყველი და ცოცხალი, რაც მუშაობის პროცესს ხდის საინტერესოს. გარდა ამისა, გამიკეთებია თოჯინები გასართობად ბავშვებისთვი, თუმცა, არ მიმიცია სერიოზული ხასიათი”.
